وەزارەتا به‌رگریێ یا ئه‌مەریکایێ – پێنتاگۆن دەربارێ ئێریشێن ئاسمانی یێن ل سووریێ ل دژی کۆمێن چەکدار راگهاند، د پاراستنا هێزێن خوە دە ئەم سست نابن و تەکەز کر، وان هشیاری دایە ئیرانێ کو ئەو قەبوول ناکن کۆمێن چەکدارێن نێزیکی ئیرانێ ل چ جهەکی جیهانێ ئێریشی هێزێن ئه‌مەریکی بکن.
بەردەڤکێ پێنتاگۆنێ كۆلن کاهل رۆژا چارشەمبێ 24ێ تەباخا 2022ێ د پرێسکۆنفەرانسەکێ دە بەحسا ئێریشێن وێ داویێ یێن ئه‌مەریکایێ یێن ل دژی کۆمێن چەکدار ل سووریێ کر و راگهاند، ئەو دێ ب ئاوایەکی بهێز هێزێن خوە بپارێزن و تەکەز کر، ل چ جهەکی جیهانێ ئەو ئێریشێن ل دژی هێزێن خوە قەبوول ناکن.
كۆلن کاهل گۆت: «ئەم د پاراستنا هێزێن خوە دە سست نابن، مە ب ئۆپەراسیۆنێن دوهـ شەڤ و ب رێیێن دن هشیاری دایە ئیرانێ کو ئەم ئێریشێن گرووپێن ژ ئالیێ ئیرانێ ڤە پشتەڤانیا وان تێ کرن، بۆ سەر هێزێن خوە ل چ دەرەکە جیهانێ د ناڤ دە سووریێ ژی، قەبوول ناکن، د پاراستنا خوە دە ئەم سست نابن ژی و ئەم دێ رێکارێن دن یێن گونجاو بکار بینن».
بەردەڤکێ پێنتاگۆن دیار کر، کو وان نەخوەستیە د ئێریشێ دە کەسەکی بکوژن، لێ خوەستنە د ئاستا وێ ئێریش دە بە کو 15 ڤێ مەهێ ل سووریێ ل دژی هێزێن ئه‌مەریکایێ هات کرن.
كۆلن کاهل گۆت: لەورا ژ 11 ئارمانجێن هاتبوون دیارکرن، 9 ژ وان هاتن بۆمبەبارانکرن، و ژ بەر کو ل گۆر زانیاریان ل هەردو جهێن دن خەلک لێ هەبوونە، ئەو نەهاتن ئارمانجکرن.
کاهل هشیاری ژی دا کو ئەگەر هەر ئێریشەکە دن ل سەر هێزێن وان بێ کرن، ئەوێ بەرسڤێ بدن.
دوهـ بەردەڤکێ وەزارەتا دەرڤە یا ئیرانێ ناسر کەنانی ئێریشێن ئاسمانی یێن ئه‌مەریکایێ ل دێرەزۆرا سووریێ شەرمەزار کربوو و رەد کربوو کو ئەو گرووپێن چەکدارێن کو پێگەهێن وان هاتنە بۆمبەبارانکرن، سەر ب ئیرانێ ڤە بن.
رۆژا سێشەمبێ ئارتێشا ئه‌مەریکایێ ل سەر فەرمانا سەرۆکێ وی وەلاتی جۆ بایدن چەند ئێریشێن ئەسمانی ل سووریێ ل دژی پێگەهێن گرووپێن سەر ب ئیرانێ ڤە پێکانیبوو و د ئێریشێ دە هەژمارەک چەکدار هاتبوون کوشتن.
