میرێ ئێزدیان، جڤینەکە شێورمەندیێ ل گەل کۆمەکە مەزن ژ كه‌ساتیێن ئۆلی، جڤاكی و سه‌رۆكهۆزێن شەنگالێ، ل مێڤانخانەیا پەرەستگەها لالشێ ل دارخست، رێخستنا په‌كه‌كێ ژی سه‌رۆكهۆزێن كو به‌شداری ڤێ جڤینێ بوونه ب خائین ناس كرن.
هه‌ولێن رێخستنا په‌كه‌كێ یێن په‌رچه‌كرنا رێزێن ئێزدیان و ڤه‌قه‌تاندنا ئێزدیێن شنگالێ ب داوی نابن، هه‌ری داوی سه‌رۆكهۆزێن شنگالێ یێن كو به‌رێ ب په‌كه‌كێ ره بوون، ب میرێ ئێزدیێن جیهانی و ئیراقێ «میر حازم ته‌حسین به‌گ» جڤیان و پێویستیا یه‌كرێزییا مالا ئێزدی ژ میر ره ته‌كه‌ز كرن.
حازم تەحسین سەعید «میرێ ئێزدیان ل ئیراقێ و جیهانێ و سەرۆکێ ئەنجوومەنا بلندا رۆحانی یا ئێزدیان» و ب ئامادەبوونا ئەندامێن ئەنجوومەنا بلندا رۆحانی، رۆژا شه‌می یا رابووری 27/8/2022ێ جڤینەکە شێورمەندیێ ل گەل کۆمەکە مەزن ژ كه‌ساتیێن ئۆلی، جڤاكی، سه‌ركهۆزێن شنگالێ و سه‌رۆكهۆزێن كو به‌رێ ب په‌كه‌كێ ره بوون و هه‌روه‌ها ئه‌ندامێن پارتیا «پادێ» ل مێڤانخانەیا پەرەستگەها لالشا نۆرانی ل دارخست.
د جڤێنی ده، پێویستیا یه‌كرێزیا مالا ئێزدی، ره‌وشا شنگالێ، سیاسه‌تا په‌كه‌كێ یا ل هه‌رێمێ و ناڤچه‌یێن ئێزدیان و هه‌روه‌ها پێویستیا جیبجیكرنا «په‌یمانا شنگالێ» و ڤه‌گه‌را ئاواره‌یێن ئێزدی، هاتن نیقاش كرن.
میر حازم د جڤینێ ده ووسا ئاخڤی:
«پشتی کو رێخستنا تەرۆریستا داعشێ ئێریشی هه‌رێمێن مه كری و ل شەنگالێ ل دژی گەلێ مە ژەنۆسید پێک ئانی، ئەم ئیرۆ ددن زانین کو ژ بۆ ئەم دەنگێ خوە و پەیاما خوە بگهینن هەموو جیهانێ، پێویستیا مە ب هەڤ هەیە و یا کو ژ مە رە پێویستە پەیمان و حەزکرنە، ژ بەر کو دژمنێن مە پرن و ب خوەندنا دیرۆکێ ئەم دزانن کو دژمنێن مە هەر دەم خوەستنە مە بشکینن، ژ هەڤ جودا بکن و رێزێن مە پارچە بکن».
تەکەز کر کو دڤێ ئەم ببن یەک دەست و دەنگەکی بهێز ل پێش حکوومەتا فەدەرالی یا بەغدایێ و حکوومەتا هەرێما کوردستانێ، ژ بۆ بدەستخستنا داخوازیێن خوە و بدەستخستنا مافێن خوە یێن رەوا.
وی دیار کر کو ئەرکێ منە وەک میرێ ئۆلا ئێزدی و هوون ژی ب ریا نوونەرتیا جڤاکا خوە وەکە ئۆل و عەشیران داخوازا مافێن گەلێ خوە بکن و پشتگوهـ نەکن و ئەڤ ماف بێی بدەستخستنا یه‌كتیا مە و یەکتیا گۆتارا مە، نایێ بده‌ستخستن.
میر گۆت: «ئەزێ سەردانا شنگالێ بکم و ل بەندا پێکانینا حکوومەتا داهاتی بم، داکو سەردانەکێ بۆ بەغدایێ ژی ساز بکم، داکو ب حکوومەتا ئیراقێ رە ل سەر رەوشا ئێزدییان ل کامپان و شنگالێ خالان ببێژم».
میرێ ئێزدیان، تەکەزی ل سەر گۆتنێن سەرۆکێ هەرێما کوردستانێ، نێچیرڤان بارزانی کر کو ئێزدی بەشەکە پێکڤە یا گەلێ کوردن و تو کەس نکارە ئێزدیان ژ کوردستانێ دەرخینە.
د داویا ئاخافتنا خوە دە میر گۆت کو ژنێن ئێزدی یەکتیا خوە ددۆمینن و ئەم هەموو ژ بۆ ژنێن ئێزدی بێی فەرق و جوداهی تەڤدگەرن.
كەساتی و سەرۆكهۆزێن شنگال و سەرۆكهۆزێن كو به‌رێ ب په‌كه‌كێ ره بوون، هه‌ڤرێ بوون كو سه‌ده‌ما سه‌ره‌كه یا چۆلبوونا شنگالێ ژ بۆی سیاسه‌ت سته‌ما په‌كه‌كێ و حه‌شدا شه‌عبی ڤه‌دگه‌ره كو ئه‌ڤ هه‌ردو هێزێن نه‌مه‌شرووع ل همبه‌ری ئاڤه‌دانكرن و ڤه‌گه‌را كۆچبه‌ران بوونه ئاسته‌نگی، هه‌موه‌خت بوونه ئاسته‌نگی ل همبه‌ری جیبجیكرنا په‌یمانا شنگالێ.
په‌كه‌كێ سه‌رۆكهۆزێن به‌شداری جڤینا میر بووین ب خائین ناسكرن
جڤینا میرێ ئێزدیان یا ب كه‌ساتی و سه‌رۆكهۆزێن شنگالێ، دهێته وێ واته‌یێ كو هه‌ولێن په‌كه‌كێ یێن ڤه‌قه‌تاندنا ئێزدیێن شنگالێ و په‌رچه‌كرنا جڤاكا ئێزدی هه‌رتم وێ راستی شكه‌ستنێ بهێن.
گرێدای سیاسه‌تا په‌كه‌كێ ل شنگالێ، میرێ ئێزدیان دوهـ رۆژا دوشه‌می 29/8/2022ێ داخویانی ژ چاپه‌مه‌نیێ ره دا و گۆت: «هه‌تا كو په‌كه‌كه و حه‌شدا شه‌عبی ل شنگالێ مابن، ئاواره‌یێن ئێزدی دێ نه‌ئاماده بن كو ڤه‌گه‌رن وارێ خوه».
