سەرۆکێ داوی یێ یەکیتیا سۆڤیەتێ میخائیل گۆرباچۆڤ، پشتی نەخوەشیەکە درێژ، شەڤا بۆری د 92 سالیا خوە دە کۆچا داوی کر.
ل گۆری داخویانیا نەخوەشخانەیا کلینیکی یا ناڤەندی یا ل مۆسکۆیێ، میخائیل گۆرباچۆڤ شەڤا بۆری پشتی نەخوەشیەکە گران و درێژ جانێ خوە ژ دەست دا.
دەستهلاتداریا گۆرباچۆڤ ب پەرەسترۆیکا و گلاسنۆست (رەفۆرم و ڤەکریبوونێ) ڤە گرێدایی بوو.
میخائیل گۆرباچۆڤ د 2ێ ئادارا 1931ێ دە ل باژارێ پرڤۆلنۆ یێ رووسیایێ ژ دایک ببوو، ل فاکولتەیا حقووقێ یا زانینگەها مۆسکۆیێ خوەندیە (1955)، د سالا 1952ێ ژی دە تەڤلی پارتیا کۆمۆنیست بوویە و د ناڤا پارتیێ دە د پۆستێن جودا کار کریە.
میخائیل گۆرباچۆڤ د 11ێ ئادارا 1985ێ دە وەک سەکرەتەرێ گشتی یێ پارتیا کۆمونیستا یەکیتیا سۆڤیەتێ هات هلبژارتن.
د سالێن 1985-1988ێ دە ب سەرۆکێ ئامەریکا رۆنالد ریگن رە بەشداری زنجیرە هەڤدیتنان بوو. د سالا 1987ێ دە ب ئامەریکا رە پەیمانەک ژ بۆ سینۆردارکرنا چەکێن نوکلەری ئیمزە کر. د سالا 1989ێ دە ڤەکشینا هێزێن سۆڤیەتێ ژ ئافگانیستانێ راگهاند و سالا 1990ی ژ بەر ئالیکاریا وی د داویکرنا شەرێ سار دە، خەلاتا نۆبەلێ یا ئاشتیێ وەرگرت.
میخائیل گۆرباچۆڤ د 21 بەرچلەیا 1991ێ دە یەکیتیا سۆڤیەتێ ب فەرمی هاتە هلوەشاند و یەکیتیا دەولەتێن سەربخوە دامەزراند.
ژ سالا 1992ێ و هەتا نها دامەزرینەر و سەرۆکێ سازیا گۆرباچۆڤ یا ناڤدەولەتی یا لێکۆلینێن جڤاکی، ئابۆری و سیاسی بوو.
