ل گۆر ئامارێن وەزارەتا مالبات و خزمەتێن جڤاکی یا ترکیێ، زێدەتر ژ 10 ھەزار مالباتان نکارن زارۆکێن خوە خوەدی بکن و فاتورەیێن خوەیێن ئەلەکتریک و گازێ ژی ب ئالیکاریان ددن.
ل ترکیا و باکورێ کوردستانێ، زێدەبوونا رێژەیا هەلاوسانێ، ھەژاری زێدەتر کریە و زێدەیی 10 ھەزار مالبات ب بێی وەرگرتنا ئالیکاریێ، نکارن فاتورەیێن خوەیێن ئەلەکتریک و گازێ بدن.
ل گۆر ئامارێن وەزارەتا مالبات و خزمەتێن جڤاکی یا ترکیە، یێن د ناڤبەرا چلە و خزیرانا 2022یێ دا ، 16 ھەزار و 424 مالبات د خانیێن نە گونجاو دا دژین.
ھەروھا 10 ھەزار و 498 مالبات نکارن زارۆکێن خوە خوەدی بکن و 2 ملیۆن و 345 مالبات ژی نکارن فاتورەیا خوە یا ئەلەکتریکێ بدن. 330 ھەزار و 804 مالبات ژی نکارن فاتورایا خوەیا گازێ بدن، کو ژ بۆ ڤان فاتورەیان ئالیکاریێ وەردگرن.
ل ترکیا و باکورێ کوردستانێ، د ئەنجاما سیاسەتێن نوویێن دەستھلاتێ رۆژ ب رۆژ رێژەیا هەلاوسانێ زێدە دبە و ئەڤ یەک ژی باندۆرەکا نەرێنی ل سەر ژیانا خەلکێ دکە.
ھەر چقاس وەزارەتا مالبات و خزمەتێن جڤاکی یا ترکیێ د چارچۆڤەیا “رووبرووبوونا ھەژاریێ” دا، بۆ ھەژمارەکا وەلاتیان ئالیکاریێ ددە، لێ ھەژاریا ھەیی ئەوقاسی زێدە بوویە کو ئەو ئالیکاری تێرێ ناکن و ب دەستپێکرنا قۆتابخانەیان ژی رەوشا مالباتان زەلالتر ھاتیە خویاکرن.
