وەزیرێ دەرڤە یێ فلستینێ بەرسڤا نامەیەکا کوردێن عەفرینێ ددە
وەزیرێ دەرڤە و کۆچبەران یێ فلستینێ ریاز ئەل-مالکی بەرسڤا نامەیا شاندەکا خەلکێ عەفرینێ دا و راگھاند، “ئەم نشتەجھکرنا ھەر فلستینیەکی ل سەر ئاخا کوردی و نە-کوردی رەد دکن.”
شاندەکا کوردێن عەفرینێ دەربارێ پرسا ئاڤاکرنا کۆمەلگەھێن نشتەجھکرنێ ل ھەرێما عەفرینێ ژ ئالیێ سازیێن فلستینی ڤە، رۆژا 8ێ ئیلۆنا 2022یێ سەردانا کۆنسولێ فلستینێ یێ ل ھەولێرێ نەزمی ھزووری کرن و نامەیەکا نەرازیبوونێ رادەستی وی کرن.
د بەرسڤا نامەیا شاندا عەفرینێ دە، وەزیرێ دەرڤە و کۆچبەران یێ فلستینێ ریاز ئەل-مالکی د نامەیەکێ دا راگھاند، “دەربارێ ئاڤاکرنا کۆمەلگەھێن نشتەجھبوونێ ژ بۆ نشتەجھکرنا فلستینیان ل عەفرین – سووریێ دا کو ھندەک ژ وان کۆمەلەیان ناڤێن فلستینی ھلدگرن، ل گۆری زانیاریێن گھیشتنە مە، ئەڤ کارەکی تاکەکەسی و ژ ئالیێ کۆمەلەیێن کو نوونەرتیا دەولەتا فلستینێ ناکن ڤە ھاتیە کرن.”
د بەرسڤێ دا ھات ژی، “رێخستنا رزگاریا فلستینێ و تێکۆشینا وێ یا بەردەوام ژ بۆ پێکانینا دەولەتا فلستینێ ب پایتەختا وێ قودس ئەل-شەریف، ب ھەموو گەلێ مە یێ فلستینێ ڤە، پابەندی مافێ ڤەگەرێ یە و ھەموو پرۆژەیێن نشتەجھبوونێ ژی رەد دکە.”
وەزیرێ دەرڤە و کۆچبەران یێ فلستینێ تەکەز کر، “یێ کو پرۆژەیێن نشتەجھبوونێ رەد بکە و ژ بۆ ئازادی و سەرخوەبوونێ تێدکۆشە، نکارە کریارێن دەستدرێژیا ل سەر زەڤی و ملکێن کەسێن دن بپەژرینە، ب تایبەت کو ئەو کەس یان کۆم فلستینی بن.”
ھەر وھا وەزیرێ دەرڤە و کۆچبەران یێ فلستینێ د نامەیا خوە دا دبێژە: “ژ بەر ڤێ یەکێ، ئەم نشتەجھکرنا ھەر فلستینیەکی د بن چ ناڤی دا ل سەر ئاخا کوردی و نە-کوردی رەد دکن و ئەم قەبوول ناکن ماف و ملکێن مالباتێن کورد ل عەفرینێ و دەڤەرێن دن یێن کوردی ل باکورێ سووریێ بێن بنپێکرن.”
ریاز ئەل-مالکی د داویا نامەیا خوە دە گۆت: “پێزانینا مە یا مەزن ژ بۆ گەلێ کورد ل سووریێ ھەیە کو ل کێلەکا تێکۆشینا گەلێ فلستینێ راوەستیا، شەھید دان و د ناڤ رەفێن شۆرەشا فلستینێ دا خەبات ژ بۆ مافێن گەلێ فلستینێ کرن.”
