یەکیتیا ئەورۆپایێ کوشتنا ژینا ئەمینی شەرمەزار کر

 یەکیتیا ئەوروپایێ د داخویانیەکێ دا کوشتنا ژینا ئەمینی شەرمەزار کر و راگھاند: “تشتێ کو ب سەر وێ دا ھات، نایێ قەبوولکرن.”

د داخویانیا یەکیتیا ئەوروپایێ دا ھات راگەھاندن: “دڤێ رایەدارێن ئیرانێ دلنیا ببن کو مافێ خەلکێ تێ پاراستن و کەسێن دەستەسەرکری، ب چ ئاوایی رەفتارا خراب لگەل وان نەیێ کرن.”

ھەروھا وەزارەتا دەرڤەیا فرانسایێ د داخویانیەکێ دا داخواز کریە “دەملدەست” لێکۆلینێن ئەشکەرە ژ بۆ دەرکەتنا راستیان وەرن ئەنجامدان.

د داخویانیا وەزارەتا دەرڤەیا فرانسایێ دا ھاتیە دەستنیشانکرن: “گرتن و مرنا مەھسا (ژینا) ئەمینی ژ ئالیێ پۆلیسێن ئاساییشا جڤاکی یا ئیرانێ ڤە، ئەم ھەژاندن. فرانسا وێ گرتن و توندووتووژیا کو بوویە سەدەما جانژدەستدانا وێ، شەرمەزار دکە.” 

ژینا ئەمینی کەچەکا کوردا 22 سالی بوو، رۆژا 13ێ ئیلۆنا 2022یێ لگەل برایێ خوە دا ژ باژارێ سەقزێ سەردانا تەھرانێ کربوو و ژ بەر کو حیجابا خوە ب ئاوایەکێ رێکووپێک گرێ نەدایە ژ ئالیێ پۆلیسان ڤە ھاتە بنچاڤکرن و پشتی دو دەمژمێران ژ بەر ئەشکەنجەدانێ ژ بۆ نەخوەشخانەیێ ھات برن و رۆژا 16ێ مەھێ ل نەخوەشخانەیێ جانێ خوە ژ دەست دا.