سەرۆک کۆمارێ ترکیێ رەجەب تەییب ئەردۆگان گۆت، “ترک ژی و کورد ژی وەلاتیێن منن، عەرەب ژی وەلاتیێن منن. ئەم چ جار جوداھیێ د ناڤبەرا وان دا ناکن و مە قەت نەکریە.” ئەردۆگان دبێژە کو ل ترکیێ پرسا کورد تونەیە و گۆت: “ئەگەر ھوون بوویەرێ وەک پرسا کورد و ترکان بنرخینن ھوونێ خەلەت بن. بوویەر نە پرسا کورد و ترکانە. بوویەر ب تەڤاھی مەسەلەیا تەرۆریستان و نە تەرۆریستانە.”
رەجەب تەییب ئەردۆگان کو ژ بۆ 77ەمین لژنەیا گشتی یا نەتەوەیێن یەکبوویی ل نیو یۆرکێ یە، بوو مێڤانێ تەلەڤیزیۆنا PBS یا ئامەریکی و بەحسا سیاسەتا وەلاتێ خوە و رۆژەڤا جیھانێ کر.
ئەردۆگان دیار کر کو ناتۆ رێخستنەکە لگەل رێخستنێن تەرۆرێ نینە، رێخستنەکە کو ل دژی تەرۆرێ تێکۆشینێ دکە و گۆت: “خالا پێنجەمینا ناتۆیێ خالەکا تایبەتە کو ئارمانجا وێ پاراستنا ھەڤبەشا ئەندامێن وێیە و ئەم ل بەندێ نە کو ئەڤ یەک بهێتە جێبەجێکرن. ژ بەر کو ئەم 40 سالن ل دژی تەرۆرێ شەر دکن.”
ل سەر پرسا “نە تەنێ ل سوێد و فینلاندا، ل سووریا، ئیراق و وەلاتێ وە ژی پرسگرێکا کوردان ھەیە. ل گۆری وە ئەڤ پرسگرێک چاوا دکارە بهێتە چارەسەرکرن؟” ئەردۆگان گۆت: “بەری ھەر تشتی ئەم ڤێ یەکێ سەراست بکن، ئەگەر ھوون بوویەرێ وەک پرسا کورد و ترکان بنرخینن ھوونێ خەلەت بن. بوویەر نە پرسا کورد و ترکانە. بوویەر ب تەڤاھی مەسەلەیا تەرۆریستان و نە تەرۆریستانە. نھا ل باکورێ سووریێ کورد و عەرەب ھەنە. ل ئالیێ مە د ناڤ ڤان عەشیران دا کورد ھەنە، لێ عەرەب ژی زێدەترن. د ناڤ پارتیا من دا ھەڤالێن منێن کورد ھەنە، پارلامەنتەرێن مەیێن کورد ھەنە، د ناڤا مە دا چ پرسگرێک نینە. نھا ل ھەرێمێن باشوور و رۆژھلاتێ وەلات، پارتیا مە دویەمینە و ب گرانی وەلاتیێن کورد ل ڤر دژین.”
ئەردۆگان ھەروھا گۆت: “وەکە دەولەت مە وەبەرھێنانێن گەلەک جدی ل ڤان ھەرێمان کر. ئەم نابێژن ل ڤێ ھەرێمێ کورد لێ دژین و ئەم ل ڤر وەبەرهێنانێ ناکن. ترک ژی و کورد ژی ھەموەلاتیێن منن، عەرەب ژی وەلاتیێن منن. ئەم چ جارا جوداھیێ د ناڤبەرا وان دا ناکن و مە قەت نەکریە. ئەم نھا د ھەمان ھەلوەستێ دا نە. نێزیکاتیا مەیا ل ھەمبەری ھەموو وەلاتیێن مە یەکە.”
سەرۆک کۆمارێ ترکیێ ل سەر پرسا “وەکە ترکیا نیەتا وە ھەیە کو ھوون ب ئاوایەکی دایمی رێ ل بەر سوێد و فینلاندایێ بگرن کو تەڤلی ناتۆیێ ببن؟” گۆت، “دڤێ ھوون ڤێ جارێ ببینن، ل ڤر ب تایبەتی ژی سوێد ھەما بێژە بوویە وەکە کورکا تەرۆرێ.”
ئەردۆگان دبێژە کو “تەرۆریست” گھیشتنە ناڤ پارلامەنتۆیا سوێدێ و گۆت: “مە گەلەک جاران بەلگە دانە ئالیێ سوێدی کو تەرۆریست ل کۆلانێن ستۆکھۆلمێ دمەشن، پانکارتێن سەرکردەیێ تەرۆریستان ھلدگرن و ئێریشی ترکێن مەیێن سافێن ل سوێدێ دکن. ئەگەر ھوون ببێژن ‘ما فینلاندا ژی وھایە؟’ نەخێر نە وەک سوێدێیە. د ڤێ دەمێ دا ئەو ئارامترن و رەوش د بن کۆنترۆلا وان دا نە. لێ ل سوێدێ سەردەستیەک وھا تونە. ھەر تم ب بەهانەیا بەرسڤێ ددن مە. دبێژن، ‘ئەڤ ل گۆر دەستوورا مە دکەڤە چارۆڤەیا ئازادیان دا’. ئەز ژی دبێژم، تەرۆرێ چ پەیوەندی ب ئازادیێ ڤە نینە، د پێناسەیا ئازادیێ دا جھێ تەرۆرێ نینە، ژ بەر ڤێ یەکێ ئەگەر ھوون تێکۆشینا خوە ل دژی ڤان تەرۆریستان بدن مەشاندن، ئەم دێ ھەر جورە پشتگریێ بدن ڤێ یەکێ. بێگومان بریارا داوی پارلامەنتۆیا مە ددە.”
ئەردۆگان ھەروھا گۆت: “ئەز دخوازم ل ڤر تشتەکێ دن ژی بینم زمان، پشتی کو مە چەند ھەڤدیتن کر، مخابن ئەم دبینن کو ھێژ ل کۆلانێن ستۆکھۆلمێ مەشێن تەرۆریستان بەردەوامن. ھلبژارتن ل وی وەلاتی چێبوو. پارتیا کو نوو ب سەر کەت، د گۆت کو ئەو دێ دەستوورێ نەدن وان. ھێڤیدارم رێ ب وان تەرۆریستان نەیێ دایین و وێ دەمێ ئەم ژی دێ ھەموو ھێسانکاریان ژ بۆ سوێدێ بکن.”
