رێخستنا لێبۆرینێ یا ناڤدەولەتی دەربارێ خوەپێشاندانێن ئیرانێ دا ھشیاری دا

رێخستنا لێبۆرینێ یا ناڤدەولەتی (Amnesty International) دەربارێ بێدەنگکرنا خوەپێشاندانێن ئیرانێ دا ژ جڤاکا ناڤدەولەتی داخواز کر “کارەکی واتەدار” بکن.

رێخستنێ دەستنیشان کر، نەرازیبوونێن پشتی کوشتنا ژینا ئەمینی تێنە نیشاندان، کو رادەیا ھێرسا خەلکێ ل ھەمبەر حیجابا ب زۆرێ و کوشتنێ نیشان ددە، ژ ئالیێ ھێزێن ئەولەھیا ئیرانێ ڤە گەلەک ب توندی تێ بەرسڤدان.

رێخستنا لێبۆرینێ یا ناڤدەولەتی داخوازا ھەولەکا ناڤدەولەتی ژ بۆ رێلبەرگرتنا ل خوینرژاندنا زێدەتر ژ ئالیێ ھێزێن ئەولەھیا ئیرانێ ڤە دکە.

رێخستنێ ل گۆر بەلگەیێن خوە دیار کریە، د ناڤا دو شەڤێن بۆری دا (21-22یێ ئیلۆنێ) ل 20 باژار و 10 پارێزگەھان، ھێزێن ئەولەھیێ تەقەیێن راستەراست ل خوەپێشاندەران کرنە و د ئەنجامێ دا “ھەری کێم 30 کەسان کو ژ وان 4 کەس زارۆک بوون، جانێ خوە ژ دەست دانە”.

شەڤا ئینێ (23یێ ئیلۆنێ) تەلەڤیزیۆنا فەرمی یا ئیرانێ راگھاند، 35 کەس د خوەپێشاندانان دا ھاتنە کوشتن.

ھەروھا رۆژا ئینێ، سەرۆک کۆمارێ ئیرانێ ئیبراھیم رەیسی ژ ئامەریکایێ ڤەگەریا و ل بالافرگەھا تەھرانێ، گەف ل خوەپێشاندەران خوار و گۆت: “د چ رەوشێ دا ئەم ناھێلن ئەولەھیا خەلک و وەلاتێ مە، تووشی مەترسیێ ببە.”