باسکێ لەشکەریێ په‌كه‌كێ، هه‌په‌گێ راگهاند کو ئەندامێن وان یێن ب ناڤێن «ئاتیلا چیچەک و حسێن یلدرم» ئیرۆ ژ ئالیێ ئەرمەنستانێ ڤە رادەستی ترکیێ هاتنە کرن.
ئاژانسا ئانادۆلویێ راگهاند کو ئیستخباراتا ترکیێ (میتێ) گەریلایێن هه‌په‌گێ «ئاتلا چیچەک و حسێن یلدرم» ل سەر سینۆر د ئۆپەراسیۆنەکێ دە گرتنە و ئانینە ترکیێ.
هات راگهاندن کو ئاتیلا چیچەک یێ ب كۆدناڤێ «لەهەنگ» و حسێن یلدرم یێ ب كۆدناڤێ «ئەلیشێر» د لیستەیا بولتەن یا سۆر دە بوونە.
باسکێ لەشکەری یێ په‌كه‌كێ، هه‌په‌گێ دیار کر کو چیچەک و یلدرم ژ ئالیێ ئەرمەنستانێ ڤە رادەستی ترکیێ هاتنە کرن.
هه‌په‌گێ گۆت:«د تەباخا 2021ێ دە هەڤالێن مە لەهەنگ و ئەلیشێر ل نێزی سینۆرێ ئەرمەنستانێ هاتنە دەستەسەرکرن و دۆز ل سه‌ر وان هاتنە ڤەکرن، د 23ێ سباتا 2022ێ دادگەها تەمییزێ یا ئەرمەنستانێ دەربارێ وان بریارا بەردانێ دایە.
ل گۆری هه‌په‌گێ پشتی كو هاتینه به‌ردان، «ئاتلا چیچەک و حسێن یلدرم» ژ ئالیێ ئیستیخباراتا ئەرمەنستانێ هاتنە رەڤاندن و بۆ دەولەتا ترک هاتنە رادەستکرن.
