ل بهغدا و هەژمارەک پارێزگەهێن دن یێن ئیراقێ، ژ بۆ بیرانینا «خوپێشاندانێن جۆتمەهێ» خوەپێشاندانان دەست پێ کرن و هێزێن ئەولەهیێ پرانیا ریێن بەر ب ناڤچەیا کەسک ڤە دچن گرتن.
ئیرۆ رۆژا شهمی 1/10/2022ێ خوەپێشاندانێن «تشرینیان» دەست پێ کرن ڤه و هەژمارەکە مەزن ژ ئەندامێن هێزێن لەشکەری و ئەولەهیێ ل بهغدایێ هاتنە بەلاڤ کرن.
هەموو رێیێن بەر ب ناڤچەیا کەسک و مەیدانا تەحریری ڤە دچن، ژ بۆ رێگرتنا ل پێش خوەپێشاندهران، ژ ئالیێ هێزێن ئەولەهیێ ڤە هاتنە گرتن، خوهپێشاندهر ڤێ جارێ ل مەیدانا نسۆر و مەیدانا تەحریرێ کۆم بوون و دخوازن ژ وان هەر دو جهان ڤە بەر ب ناڤچەیا کەسک ڤە بچن.
ناڤچەیا کەسک ل ناڤا بهغدایێ دکەڤە، بالیۆزخانەیا ئامەریکا، بالیۆزخانەیێن هەژمارەک وەلاتێن دن، بارەگەهێن هێزێن هەڤپەیمانیا ناڤدەولەتی، بارەگەها حکوومەتا ئیراقێ و هن دەزگەهێن دن لێ نە.
د رۆژێن دەرباسبوویی دە، کۆمیتەیەکە ب ناڤێ «هەڤرێزیا بلندا خوەپێشاندانان ل ئیراقێ» لهەڤکرنەک راگهاند کو د دەستپێکا جۆتمەهێ دە ل پایتەخت بهغدایێ خوەپێشاندانێن گرسەیی پێک بینن، دیار کر ژی، ئەوێ ب ئاوایەکی ئاشتیانە و بێ توندوتووژیێ دەرباسی ناڤچەیا کەسک ببن.
رۆژا 1ێ جۆتمەها 2019ێ کو خوەپێشاندانان ل بهغدا و پارێزگەهێن ناڤەراست و باشوورێ ئیراقێ دەست پێ کربوون کو ب «خوەپێشاندانێن تشرینێ» تێن ناسکرن، د سالڤەگەرا 3مین یا ڤان خوەپێشاندانان دە ژی، ل بهغدا و هن پارێزگەهێن باشوورێ ئیراقێ خوەپێشاندانان ژ بۆ دابینکرنا خزمەتگوزاریان، سینۆردارکرنا چەکان د دەستێ هێزێن ئەولەهیێ دە و جەزاکرنا کوژەرێن خوەپێشاندەران، دەست پێ کرنە.
خوەپێشاندانێن جۆتمەهێ ل سەر داخوازا خوەپێشاندەران بووبوو سەدەما رووخاندنا حکوومەتا وێ دەمێ یا ب سەرۆکاتیا عادل عەبدولمەهدی، ئاڤاکرنا حکوومەتەکە دەمکی و ل دارخستنا هلبژارتنێن پێشوەخت.
ل هەمبەرێ ژی، هێزێن ئەولەهیێ ب توندی دەستێوەردان کرن و ل گۆری مەدیایا ئیراقێ، د رووبرووبوونا هێزێن ئەولەهیێ و خوەپێشاندەران دە، ژ دەستپێکا خوەپێشاندانان ڤە زێدەتر ژ 500 کەسان هاتن کوشتن و زێدەتر ژ 20 هەزار کەسان ژی بریندار بوونە.
