ئەنجوومەنا هەماهەنگی یا سەندیکایێن مامۆستەیان یا ئیرانێ د داخویانیەکێ دە پشتەڤانیا خوە ژ گرەڤ و خوەپێشاندانان رە نیشان دا و بانگ ل مامۆستە و خوەندەکاران کر، رۆژا سێشەمێ گرەڤێ بگرن و نەچن هۆلێن خوەندنێ.
ئەڤ بانگەوازیا ڤێ ئەنجومەنێ، پشتی ئێریشا هێزێن ئەولەهیێ ل زانینگەها شەریف ل تەهرانێ و دۆرپێچکرنا خوەندەکاران هات بەلاڤکرن کو هەتا دەمژمێرێن دەرەنگێن شەڤا یەکشەمێ دۆم کر.
د داخویانیێ دە هات گۆتن، «هێزێن تەپەسەرکەر ب بەشداربوونا ل زانینگەها شەریف و بلندکرنا چەکان ل دژی مامۆستە و خوەندەکاران، هەول دانە دەنگێ ڤان جوانێن کو داخوازا مافێن وەلات دکن، بێدەنگ بکن».
ئەنجوومەنا هەڤاهەنگی یا سەندیکایێن مامۆستەیان یا ئیرانێ داخواز ژ لەشکەران کر کو ئەرکێ خوە یێ بنگەهین کو پاراستنا جان و ئەولەهیا وەلاتیانە ب جهـ بینن و ل کێلەکا خوەپێشاندەران و کەسێن داخوازا دادوەریێ دکن بن و ژ زۆرداران جودا ببن.
هەر وها بانگ ل خوەندەکاران کر کو رۆژا سێشەمێ 4ێ جۆتمەهێ، رۆژا بەری «رۆژا مامۆستەیانا جیهانێ» دەست ب گرەڤێ بکن و «هەڤگرتنا خوە ژ هەموو خوەپێشاندەرێن ل دژی ستەمکاران رە نیشان بدن».
ئەڤ بانگەوازی د دەمەکێ دە یە، پشتی کوشتنا کەچا کورد ژینا ئەمینی رۆژ ب رۆژ خوەپێشاندانێن خەلکێ ئیرانێ زێدە دبن و هێزێن ئەولەهیێ هەولا تەپەسەرکرنا خوەندەکار و خوەپێشاندەران ل باژارێن بچووک و مەزن ددن.
