بانگەوازی ژ بۆ رێڤەبەرییا یەنەکێ؛ گەلۆ ھوون دزانن ل سلێمانیێ چ دقەومە؟

slemani-pkk-ynk-net

دو رۆژان به‌رێ د مەدیایێ دا نووچەیەک دەرکەتبوو کو ل سلێمانیێ ژنەکا پەکەکەیی ھاتیە کوشتن، ب راستی ئەڤە نە جارا یەکەمە، ئەڤە کەسێ چارێ یە ژ پار وەرە ل سلێمانیێ ژیانا خوە ژ دەست ددە، ھەر وھا ئێریشێن رۆژانە یێن ھەوایی ل دەردۆرا سلێمانیێ بێناڤبەر روو دده‌ن، ھەما بێژە وەک باژێرێ کازابلانکا ھەر رۆژ ل جھەکێ سلێمانیێ تەقین چێدبە، ھەکە ئەم هوور لێ بنێرین سلێمانی ل گەل تەڤلیهەڤیەکا گران دا روو ب روو مایە.

ئەم دکارین ڤێ تەڤلیهەڤیێ ب کورتاسی وھا بنرخینن: «پەکەکە تربا یەنەکێ دکۆلە، لێ مخابن رێڤەبەریا یەنەکێ ناخوازە وێ راستیێ ببینە».

د ناڤا یەنەکێ دا باسکێ پەکەکێ ھەیە

ژ سالێن 1990ێ ڤە پەکەکە ب ئاوایەکی جددی دخوازە باسکەکێ یەنەکێ ژێ قوت بکە، بەرێ سەرۆکێ پەکەکێ ئۆجالان د ڤێ مژارێ دا جەمیل بایک ئەرکدار کربوو، جەمیل بایک دەستپێکێ دخوەست ژ د.فوئاد دەست پێ بکە، ھەر دەم دخوەست د ناڤا یەنەکێ دا باسکەکێ قوت بکە.

جەمیل بایک د سالێن 1990ێ ده‌ نکاریبوو ڤی کاری سەر بخە، لێ پشتی سالا 2010ێ پەکەکێ ل شوونا کو باسکەکی ژ ناڤ یەنەکێ قوت بکە، د ناڤ یەنەکێ دا ژ بۆ خوە باسکەک چێکر، ئەڤە مژارەکا پڕ درێژە، لێ ئەم تەنێ دکارین ببێژین کو یەنەکێ د ھلبژارتنێن پارێزگاریێ یێن گولانا 2014ێ دا داربە خوار، د ھلبژارتنێن پارلامەنتۆیێ دا ژی رێژەیا دەنگێن خوە گەلەک کێم کرن، رەحمەتی مام جەلال نەخوەش بوو، ھلبژارتن تێک چوون، رێڤەبەریا یەنەکێ نەئارام بوو، د یەنەکێ دا تێکچوونا دەروونی و سیاسی رێیا پەکەکێ ڤەکر.

پەکەکە د بن ناڤێ «ئەم ئالیکاریا یەنەکێ دکین» دەرکەت ھۆلێ و ب گرانی کەفتە ناڤا جه‌ماوه‌رێ وێ، پشتی سالا 2012ێ پەکەکە ب تەمامی بو  پارچەیەک ژ ئه‌جێندایا ئیرانێ ل رۆژھلاتا ناڤین».

جەمیل بایک ب تێکلیێن تایبەت د ناڤا یەنەکێ دا گرۆپەک ژ بۆ خوە چێکر، ناڤێن وەک «ئارێز عەبدوللا، وەستا رەسوول» و ھتد، د ئاستا فەرماندارییا پێشمەرگەیێن یەنەکێ دانە و گوھێ وان ل جەمیل بایکە، نە کو گوھ ددەنە سەرۆکاتیا یەنەکێ.

ب تایبەتی د سەردەما لاھۆر جەنگی دا کو هەڤسەرۆکێ یەنەکێ بوو، پەکەکێ ل سەر ھەموو سازیێن یەنەکێ وەکە مەدیا، سەندیکایا رۆناکبیری، ھێزێن پێشمەرگە، نیزاما گشتی، دەردۆرێن ئابۆری باندۆرا خوە چێکر.

یەنەکە دووپشکی د بەریکا خوە دا دگێرینیت

ئەندامێن یەنەکێ ژ بەر دژبەریا پەدەکێ چاڤێن خوە سەر پەکەکێ گرتن

ئەڤ رەوشە پشتی لاھۆر جەنگی ژی بەردەوامە، ب راستی پرانیا کادرۆیێن یەنەکێ تەنێ «پشتگریا پەکەکێ دکن ژ بەر کو ئەو ل دژی پەدەکێ یە».

مخابن نکارن ببینن کو «پەکەکە ژ سلێمانیێ ئێریشی پەدەکێ دکە، ئەڤە راستیە، ھندەک کادرۆ و ئەندامێن یەنەکێ کێفخوەش دبن کو «پەکەکە زیانێ دگەهینیت پەدەکێ» لێ ئەڤە شاھیەکا ڤالایە، یا راست یێ کو دێ زیانێ بینیت یەنەکە ب خوە یە، یەنەکە دووپشکی د بەریکا خوە دا دگێرینیت، لێ ئەو دووپشک دێ ب یەنەکێ ب خوه‌ ڤەدە.

ژ بەر کو یەنەکە مالا خوە ددەتە پەکەکێ، دەما کو یەنەکە ھەول ددەت ژ پەدەکێ دەستکەفتیان وەربگرە، ھێزا خوە زێدەتر ل گەل پەکەکێ دا پارڤە دکە، پەکەکە خوە وەکە ئالتەرناتیڤێ یەنەکێ برێخستن دکە، سلێمانی ژ بەر دەستھلاتەکا دوئالی، د وارێ ئابۆری، ئەولەکاری و ئارامیێ دا تووشی زیانەکا مەزن دهێت، نھا سلێمانی وەکە بارەگەھەکێ پەکەکێ دھێتە تەماشەکرن، پەکەکە د قادا ناڤنەتەوەیی دا وەک رێخستنەکا تەرۆریستی دهێت قەبوول کرن، له‌وما ژی دێ سلێمانی ب ھەبوونا پەکەکێ دەستھلاتا خوە ژ دەست دەت.

ل ھەر تاخەکێ سلێمانیێ مالەک، ل ھەر چیایەکێ وێ ژی تیمەکا پەکەکێ ھەیە

پەکەکێ ل ھەر تاخەکێ سلێمانیێ مالێن ڤەکری و ڤەشارتی ھەنە، کادرۆیێن پەکەکێ د دەھان مال و یەکینەیێن د بن ناڤێن مەدیا، دیپلۆماسی، ئابۆری، ئیستیخبارات، رۆژئاڤا، رۆژھەلات، باکور، ژن، مێر، جوان، سیاسەت، وەرزش، ئاکادەمی و ھتد دا هەنە، ل گۆری خەلکێ سلێمانیێ بێی رووبرووبوونا خەباتکارێن پەکەکێ نە مومكینه‌ سەردانا ناڤەندێن بازرگانی، خوارنگەھ و پارکێن باژێری بکن.

ئەڤە کەس گەفان ل وەلاتیێن باشوور یێن ژ پەکەکێ دەرکەتنە ژی دكه‌ن، کەسێن ھاتین وندا کرن و کەسێن ژ ئالیێ پەکەکێ ڤە ھاتنە گرتن ھەنە، یەک ژ وان کەسێن کو ژ ئالیێ پەکەکێ ڤە ھاتنە گرتن «زەکی چەلەبی» یە کو د 19ێ گولانا 2022یێ دا ل سلێمانیێ ھاتبوو کوشتن.

دڤێت رێڤەبەریا یەنەکێ ھەلوەستا مام جەلال ژ بیر نەکە

ژ بۆ سلێمانیێ رەوشەکا مەترسیدارە کو پەکەکێ ل ور خوە تەنزیم کرییە، ژ بۆ یەنەکێ رەوشەکا گەلەک مەترسیدارە، کەس نابێژە بلا یەنەکە ئێریشی پەکەکێ بکە، لێ بەلێ یێ کو باشتر ژ هەموویان دزانی ھەلوەستا پەکەکێ یا ل ھەمبەری دەردۆر و کۆمێن کو د گەل دا پەیوەندی هەنە چ قاسی خرابکارە، مام جەلال بوو.

نەجارا یەکێ یە کو سلێمانی دبیتە یەک ژ ناڤەندێن پەکەکێ، ڤێ یەکێ د سالا 1993ێ دا ھێدی ھێدی دەست پێ کر ھەتا سالا 1999ێ، ناڤێن وەک پەکەکە جەمیل بایک ژی د ناڤ دا، ل سلێمانیێ ب جیھ ببوون، ل نەخوەشخانه‌یێ، چاند و ھونەرێ و وەکە نھا ب دەھان خەبات ھەنە، د وێ دەمێ دا پەکەکە دچوو مالا یەکی دژمن و یێ دن دپاراست ژ بۆ کو ھندەک ناکۆکیێن ناڤ یەنەکێ دا دەرخینە، زارۆک د تەمەنەکی بچووک دا ھاتن رەڤاندن و مرۆڤ ھاتن سزادان.

لێ پاش ھەر تشت گوھەری، عەڤدللا ئۆجەلان ھات گرتن و پەکەکێ ب تەعلیماتا ترکیێ دەست ب ئێرشا سەر یەنەکێ کر، پێشمەرگە شەھید کرن و ئێدی گوھ نەدا یەنەکێ، ل وان خست.

د سالا 1999ێ دا مام جەلال دەست ب پێنگاڤا دەرخستنا پەکەکێ ژ سلێمانیێ کر، ھشیاری دا پەکەکێ، پەکەکێ ژی ل دژی وێ ئێرشی پێشمەرگەیێن یەنەکێ کر، مام جەلال پشتی سالا 1999ێ چ جاران دەستوور نەدا کو پەکەکە ل سلێمانیێ سازیەکا تەنێ ژی ڤەکە، یەک کەس ژی ل ور ب جیھ بکە.

مام جەلال پەکەکە نەئانی سلێمانیێ، ھەر چەند پەکەکێ ب بەردەوامی پرۆپاگاندایەکا ووسا دکر کو تێکلیێن مە د گەل مام جەلال دا باش بوون لێ د راستی دا مام جەلال ھەڤسارێ پەکەکێ خست بوو دەستێ خوە دا.

د سالا 2000ێ دا پەکەکێ شەڤەکێ ژ نشکان ڤە ل گوندێ «عەلی رەشێ» ئێرشی پێشمەرگەیێن یەنەکێ کرن، د ڤێ ئێرشێ دا دەھان پێشمەرگە شەھید کەتن، د رادیۆیان دا ل سەر مام جەلال گۆتنێن ھۆڤانە یێن وەک «فاحیشەیا سیاسی» ب کار ئانین، ھەتا وێ دەمێ شێرکۆ بێکەس ژی د رادیۆیێن یەنەکێ دا دەرکەتبوو و ب ئاشکەرە گۆتبوو، «ئەگەر جەحشەک ل ئۆرتێ ھەبە، پەکەکە» یە، دگۆت: «پەکەکە جەحشێ ترکیێ» یە.

مام جەلال: «تو پەکەکێ ببەی مالا خوە، خوارنێ بدەیێ، وێ خوەدی بکەی ژی پاشێ ئەو دێ هێتە سەر نڤینێن تە و بێژیت ئەڤە نڤینا منە، ژ ڤێرە دەرکەڤە».

مام جەلال پەکەکە باش ناس دکر، د سالا 2008ێ دا موراد قارایلان ب ئاوایەکی نەراستەراست نامەیەک ژ مام جەلال را شاند و ژ وی خوه‌ست کو رێکێ بدنە ھندەک سازیێن وەکی پەدەکێ، مام جەلال دبێژیتە بەرپرسێ یەنەکێ یێ رانیایێ: «گۆتنەک ژ بۆ عەرەبان ھەیە، دبێژن سلاڤ نەکەنە عەرەبان، ئەو دێ ب پێلاڤ ڤە هێنە سەر جل و بەرگێن وە» رەوشا پەکەکێ ژی ئەڤەیە، تو چ قاسی ئالیکاریێ بخوازی ژی ئەو قەت قیمەتێ نادەنە تشتێن کو تو ژ بۆ وان دکەی و ئەو دێ هێن سەر نڤینێن تە و بێژن: «ئەڤە نڤینێن مەنە»، ھەر کو ئەم رێ ددەین وان، ژ پشتێ ڤە ل مە دخن و مە دکوژن، ھەیا کو مام جەلال ساخ و بباندۆر بوو، نەهێلا پەکەکە ل سلێمانیێ جهێ خوە بکەت.

دڤێت رێڤەبەریا یەنەکێ راستیێ ببینیت

ھەلوەستا مام جەلال ھەلوەستەکا راست بوو، سلێمانی ژ بەر وێ ھەلوەستێ ژی ئارام بوو.

ھەلوەستا سەرکردایەتیا یەنەکێ کو نھا سلێمانیێ دکەتە قادا شەرێ پکەکێ، رەوشا سلێمانیێ دخە ناڤا مەترسییەک مەزن دا، چیایێن سلێمانیێ ڤەگوھەرینە قادا شەر، پەکەکە دبێژە ئیرانێ ل ھەرێمێ  ئەز ھەمە، ئەز ژ یەنەکێ بھێزترم، من ئەساس بگرن، دبێژە ئیراقێ ژی د ناڤا یەنەکێ دا باندۆرا من ھەیە، من ئەساس بگرە، دخوازە ب دەرفەتێن یەنەکێ ببە ھێزەک ل دژی یەنەکێ، ژ ئابۆریا یەنەکێ بەهرا خوە دخوازە، ژخوە ل گەلەک جیهێن وەکی پێنجووینێ ل سەر سینۆری گومرکێ وەردگرە، ژ گەل و کارسازان باجێ دستینە، ژ بەر ھەبوونا وێ سلێمانی ژ ئالیێ ئابۆری ڤە رۆژ ب رۆژ لاواز دبە، یەنەکە چەقێ بن لنگێ خوە دبڕیت.

دڤێت رێڤەبەریا یەنەکێ بهێتە سەر ھشێ خوە ڤە و سلێمانیێ ژ ڤێ تەڤلیهەڤیا زێدە رزگار بکە، دڤێت رێڤەبەریا یەنەکێ باش بزانە کو نە دیارە کا «پەکەکەیا کو ئیرۆ ژ سلێمانیێ دژمناتییا پەدەکێ دکە» دێ سبە وەکە سالا 2000ێ ل یەنەکێ زڤریت و بێژیتێ ھوون نکارن سلێمانیێ ئیدارە بکن و ژ ڤێرە دەرکەڤن.

دڤێت یەنەکە ژ بن باسکێ ئیران و پەکەکێ دەرکەڤیت و ل سلێمانیێ خوەدی دەرکەڤیت.

پوستێن ھەمان بەش