خوەپێشاندان ل پرانیا باژارێن مەزن و زانینگەهێن ناڤدارێن ئیرانێ بەردەوامن، ل باژارێ سنە یێ رۆژهلاتێ کوردستانێ، هێزێن چەکدار تەقە ل وەلاتیەکی کو د ناڤا ئۆتۆمۆبیلا خوە دە بوو کر و هات کوشتن، پشتی وێ بوویەرێ ژی خەلکێ داکەتن سەر کۆلانان.
ڤیدیۆیەک کو ل سەر تۆرێن جڤاکی هات وەشاندن نیشان ددە کو گەلەک کەس ل دۆرا ئۆتۆمۆبیلەکێ کۆم بوونە، ل گۆری شاهدان ژی، کەسەکی د ئۆتۆمۆبیلا خوە ب گوللـەیا هێزێن ئەولەهیێ هاتە کوشتن.
پشتی وێ بوویەرێ خەلک داکەت کۆلانان، ل گەلەک جهان لاستیک شەوتاندن و ل دژی رایەداران درووشم ئاڤێتن.
ئیرۆ شەمیێ 8ێ جۆتمەهێ خەلکێ باژارێ سنە، سەقز و بۆکانێ بازار و دکانێن خوە گرتن و ل چەند باژارێن دن يێن وەکە تەهران، مەشهەد، ئەسفەهان، کەرەج و قەزوینێ ژی خوەپێشاندان هاتن لدارخستن.
هەر وها ل زانینگەهێن زەهرا، تەهران، ئامیر کابیر و ئازادی ژی میتینگێن بەرفرەهـ هاتن لدارخستن و خوەندەکارێن زانینگەهێن زەنجان، مەشهەد، شیراز، قەزوین، دامخان و کرماشانێ ژی خوە پێشان دان.
سەرۆکۆمارێ ئیرانێ ئیبراهیم رەئیسی ئیرۆ ب بۆنەیا یەکەمین رۆژا خوەندنا زانینگەهێ، سەردانا زانینگەها زەهرا یا تەهرانێ کر، لێ راستی نەرازیبوون و خوەپێشاندانێن هنەک خوەندەکاران هات، خوەپێشاندەران ل دژی ئیبراهیم رەئیسی سلۆگان ئاڤێتن.
خوەپێشاندانێن ل ئیرانێ دەرباسی هەفتەیا خوە یا چارەمین بوونە، ل گۆری رێخستنا مافێن مرۆڤان يا ئیرانێ ژی، د 3 حەفتەیێن بۆری دە هەری کێم 185 کەس هاتنە کوشتن.
