تۆنەلێن پەکەکێ.. دۆژەها جوانێن کورد

تۆنەلێن پەکەکێ.. دۆژەها جوانێن کورد

د ناڤا گەلێ هندستانێ دە چیرۆکەک هەیە تێدە باس ل چار بەلاتینکان دکە کو دخوەستن پێناسەیا راستا ئاگر بزانبن. بەلاتینکا یەکەم ژ دوور ڤە ل دۆرا ئاگر دزڤرە، ڤەدگەرە و دبێژە: “ئاگر رۆناھییە.” بەلاتینک ڤێ ئاگاهیێ وەکە ئاگاهیەک کو راستیان ئەشکەرە بکە مێزە ناکن. بەلاتینکا دویەمین دچە و خوە پێتر نێزی ئاگر دکە و ڤەدگەرە دبێژە: “ئاگر تی و گەرماتی یە”، لێ بەلاتینک ڤێ یەکێ ژی وەکە ئاگاهیەک ژ بۆی ناسکرنا راستیا ئاگر کێم دبینن. بەلاتینکا سێیەم دچە و پێتر ژ ھەر دویێن دن نێزی ئاگرە دبە، باسکێن وێ دشەوتن، لەورا ڤەدگەرە و دبێژە ئاگر “شەوتینەرە.” بەلاتینکا چارەمین ب ڤێ یەکێ ژی رازی نابە دچە و ئەوقاس نێزی ئاگر دبە کو باسکێن وێ دشەوتن، پاشێ خوە داڤێژە ناڤ ئاگر، بەلاتینکا چارەمین د ناڤا ئاگر دە وندا دبە و دشەوتە.

ئەم دکارن ببێژن کو بەلاتینکا چارەمین راستی و ئەسلێ ئاگر فام کریە، لێ ئێدی نکارە وەرە و ژ مە رە ببێژە ئاگر چیە. راستیا پەکەکێ ژی دشبهە ڤێ چیرۆکێ. دەما کو ئەم دخوازن قالا راستیا پەکەکێ بکن ئان ژی ھەر کەسێ کو دخوازە راستیا پەکەکێ بزانبە، دڤێ یان دیرۆکا راستەقینە یا پەکەکێ بزانبە یانژی بچە و د ناڤا رەفێن وێ دە ژیان بکە هەیا فێم دکە پەکەکە چییە، ژ بەر کو راستیا پەکەکێ تەنێ دەما کو ئەم نکاربن قالا وێ بکن تێ زانین.

چما ئەم ڤێ چیرۆکێ ڤەدگێرن؟ ژ بەرکو یەک ژ جوانێن کورد یێ کو پەکەکە ناسنەدکر، پەکەکە وەکە پارتیەک کوردستانی و شۆرەشگەر میزە دکر، مینا بەلاتینکێن مە ل ژوور باس کرین تەڤلی پەکەکێ بوو و خوەست راستیا پەکەکێ بزانبە، لێ ئەو مینا بەلاتینکا چارەمین نینە، هەری زێدە ئەو دشوبهە بەلاتینکا سێیەمین کو هەردو باسکێن وێ شەوتی، باسکێن ڤی جوانێ کورد ژی د تۆنەلێن مرنێ دە یێن کو پەکەکە ب “تۆنەلێن بەرخوەدانێ” ب ناڤ دکە شەوتینە و ڤەگەریایە چیرۆکا راستیا پەکەکێ ژ کوردان رە دبێژە هەیا کو راستیا پەکەکێ وەرە فێم کرن.

ئەڤ جوان ب ڤی ئاوا باسی تۆنەلێن مرنێ یێن پەکەکێ دکە

ژ باکورێ کوردستانێ دەرباسی باشوور بووم ژ بۆی کو تەڤلی رەفێن پەکەکێ ببم، پاش بۆرینا مەهەکێ و دەرباس بوون ژ هن نەخوەشیان ئەم گهیشتن باشوورێ کوردستانێ، ل ور ئەم تەڤلی رەفێن پەکەکێ بووین و چووین یەک ژ کامپێن پەکەکێ، هەژمارا مە نێزی 100 کەسا بوو، موراد کارایلان و باوەر دەرسم ب مە رە جڤیان، کەسێن تەمەن بچووک و یێن نەخوەش و بریندار کو نەدکارین بەشداری شەر ببن هاتن جوداکرن، ژ وان رە هات گۆتن کو دڤێ هوون د تۆنەلان دە بخەبتن. ئەڤ یەک ژ بۆی من جیێ کێف خوەشیێ بوو و هێڤیەک مەزن ژ من رە چێکر، د مەژیکێ خوە دە من تۆنەلێن پەکەکێ وەکە تۆنەلێن ل ڤیەتنامێ ژ بۆی شەرێ ل دژی ئامەریکایێ هاتیە کۆلاندن ددیتن کو ب کیلۆمەتران درێژ بوون، لێ ئەڤ خەونا من دەوام نەکر، د رۆژێن یەکەم یێن کار کرن د تۆنەلان دە من فێم کر کو ئەڤ ئەو وارە، لێ نە ئەو بوهارە، راستە تۆنەلن لێ ب ت ئاوا مینا تۆنەلێن ڤیەتنامێ نینە، بەلکۆ وەکە تابۆتا مرنێ ژ بۆی جوانێن کوردان هات بەر چاڤێ من.

مە تۆنەل د بن کەڤرێن مەزن و ب ئاوایەک پڕ زەحمەت و نەئەولەهـ دکۆلاندن، مە تیئێنتی و ئامۆنیۆم نیترات تێکهەلی هەڤ دکرن و وەکە تەقەمەنی ژ بۆی کۆلاندنا تۆنەلان بکار دئانی، ئەڤ یەک کارەکی پڕ شاشە ژ بەر کو ئەڤ ماددە باندۆرەک هەری خەراب ل سەر وان کەسان دکە یێن کو بکار تینە، هن جاران ژی ئاموورێن بڕینا مەرمەر تێن بکارئانین لێ ئەو ژی دبوون سەدەما مرن و بریندارکرنا ب سەدان گەریلایان، ژ بەر ڤێ یەکێ تەقەمەنی پێتر دهات بکارئانین.

ژ بەر کو ئەڤ تۆنەل ژ بۆی خوەپاراستنێ بوون، دڤیابوو دو دەرگە یان زێدەتر یێن وان تۆنەلان هەبانە، ل دەما بۆمبەبارانێ پێدڤی بوو تەڤ پێویستیێن خوەپاراستنێ د ناڤا تۆنەلێ دە هەبانە، ژ خەینی دەرگەهەکی، تەڤ دەرگەهێن دن یێن تۆنەلێ ب بەتانیا دهاتن قەپاتکرن.

ژ بەر نەبوونا هەوایێ پێویست د شکەفتان دە، شلی-رتووبەت و بێهنەکە هەری زێدە ئا مادەیێن تەقەمەنیێ ل سەر دیوارێن تۆنەلان چێدبە و دبە سەدەما ئیلتیهابا مێلاکا مرۆڤ. ئەڤ رەوشا هەیی د تۆنەلان دە دبە سەدەم کو مرۆڤ بخوازە زێدە بنڤە، ل سالا 2015ان ڤڕ ڤە هەژمارەک هەری زۆر ئا چەکدارێن پەکەکێ ب ڤێ سەدەمێ راستی نەخوەشیێن جددی هاتنە، ب سەدان جوانێن تەمەنێ وان د بن 20 سالیێ دە راستی جەلتەیا دل هاتنە و مرنە.

ئەرزاق و ئاڤا د ناڤا شکەفتان دە تێ پاراستن خەراب و گەنی دبن، لێ گەریلا ژ نەچاری ڤان تشتێن خەراب و گەنی بوویی بکارتینن، ئەڤ ژی بوویە سەدەما پەیدابوونا نەخوەشیێن جور بە جور د ناڤا گەریلایان دە، رەخمی ڤێ یەکێ ل دەما کارپێکرنا ژەنەراتۆرێن کارەبێ هەژمارەک هەری زێدە ئا گەریلایان ژەهری دبن.

رایەدارێن پەکەکێ دگۆتن ئەم تۆنەلا چێدکن بلا ترک وەرن دا ئەم شەر بکن، لێ بەلێ گەلەک دەم دەرباس نەبوو و لەشکرێ ترکیێ ئێریش کر، ل “خاکورک، زاپ، چار چەلا، حەفتەنین” ل تەڤ هەرێمێن سینۆری ت تۆنەلەکی رۆلا خوە یا ب باندۆر نەبوو، تەڤ بوون جهێ مرنێ ژ بۆ جوانێن کورد. د دەهان شکەفتێن هاتیە کۆلاندن دە ب سەدان جوانێن کورد هاتن کوشتن، هەر کەسێ عەقلێ وی هەبە وێ بزانبە ب کۆلاندنا هن شکەفتان ب سەدان کیلۆمەتر ناهێن پاراستن، تەڤی کو مە دخوەست رێڤەبەریا پەکەکێ ڤێ یەکێ قەبوول بکە لێ ئەم نکارین، کەسێن کو کێماسی دیار دکرن و ژ رێڤەبەرێن پەکەکێ رە دگۆ، وەکە کەسێن ترسۆنەک و لاواز و ئاژان دهاتن تاوانبارکرن و بێدەنگ کرن.

ب ت ئاوا ئارمانج ژ ڤان تۆنەلان خوەپاراستن نینە، ماسک و بۆتلەیێن ئۆکسیجینێ کو ژ بۆی خوەپاراستنا ژ دویکێلێ دهێن بکارئانین ب تەنێ ژ بۆی دویکێلەک سڤک دکارن وەرن بکارئانین.

پەکەکێ د پرانیا تۆنەلان دە هەژمارەک هەری زێدە ئا جوانێن کورد ب کوشتن دانە، ئەڤ ژی هن میناکن ل سەر ڤان تۆنەلان:

-تۆنەلا گرێ کون ل چیایێ گارە 9 کەس

-تۆنەلا ل حەفت تەبەقێ 12 کەس

-تۆنەلا شەهید کەریم ل کافیا 16 کەس

-تۆنەلا سێدارێ 10 کەس

-تۆنەلا پیرس 16 کەس

-تۆنەلا بەدەڤە ل هەرێما زاپێ 17 کەس

-تۆنەلا مام رەشۆ 23 کەس

-تۆنەلا شەهید نەڤال 6 کەس

-تۆنەلا ئێکمالە ل چیایێ مەتینایێ 22 کەس

-تۆنەلا گوندێ شێلازا 6 کەس

-تۆنەلا نەخوەشخانەیا ل حەفتەنینێ 13 کەس

-تۆنەلا قەرارگەهێ 8 کەس

ئەڤ ب تەنێ هن میناکێن پڕ کێمن ژ وان ب سەدان میناکێن دن یێن کو ب ڤی ئاوا تێدە پەکەکێ جوانێن کورد زیندی بن ئاخ کرنە، ناسنامەیا گەریلایێن ب ڤی ئاوا تێن کوشتن ت جاران نایێ ئیفشاکرن، گەر وەرن ئیفشا کرن ژی وێ پەکەکە د چاپامەنیا خوە دە راگهینە کو ئەڤ گەریلا ل ئەنیێن شەر هەیا داوی دلۆپا خوینێ ب روحا فەدایی یا ئۆجالان شەر کریە و هاتنە کوشتن.

تەقەمەنیا ژ بۆی کۆلاندنا ڤان شکەفتان تێ بکارئانین ب سەدان جوان تووشی نەخوەشیێن گران کرنە، ژ سالا 2015ان هەیا نها ت کەس نەمایە کو ب نەخوەشیەکێ نەکەتبە، پەکەکە چارەسسەریێن هەری سادە ژ بۆی ڤان نەخوەشیان دکە، ژ بەر ڤێ یەکێ ژی هەژمارەک زێدە یان ڤان کەسان ب نەخوەشیێن گران دکەڤن.

کەسێن کو دبێژن ئەم نەخوەش کەتنە، لاشێ من دئێشە، ئەز بریندرام و نکارم شەر بکم، پەکەکە وەکە مرۆڤێن ترسۆنەک د ناڤا هەڤالێن وی دە تەشهیر دکە، ئەڤ ژی دبە سەدەما دروستبوونا گڤاشێن دەرۆنی ل سەر گەریلایان.

ب گشتی کەسێن کو د تۆنەلێن مرنێ دە کار دکن یان ئەو کەسن کو نوو تەڤلی رەفێن پەکەکێ بوونە، یان ئەو گەریلانە یێن کو بریندار بوونە و نکار شەر بکن، یان ژی کەسێن ساخلەمن لێ ژ بۆ رۆژەکی ژی چەک ل ملێ خوە نەکریە و چ دکە ژی فێری بکارئانینا چەک نابە. هەژمارەک کەسێن ژ بەر بکارئانینا تەقەمەنیێ ژ بۆی کۆلاندنا تۆنەلان ب ئاوایەکی گران بریندار بوونە و نکارن ل چیێ ت کاران بکن، پەکەکە وان دشینە مالێن برینداران یێن ل مەخموورێ و کۆبانێ.

ب کورتاسی، د ڤان سالێن داویێ دە ژ بەر بۆمبەبارانا بەردەوام یا لەشکرێ ترکیێ، پەکەکە نەچار مایە تەڤ کادرۆیێن خوە بخە د شکەفتان دە، مایینا چەکدارێن پەکەکێ ژی د ڤان شکەفتان دە ژ بۆی دەمێن درێژ، وان تووشی رەوشەکە دەرۆنی یا گران دکە.

بەلێ، ئەڤ چیرۆکا یەک ژ وان جوانێن کوردە کو مینا بەلاتینکێن دخوەستن راستیا ئاگر بزانبن دخوەست راستیا پەکەکێ بزانبە، ئەڤ جوان نها بەشەکی بچووک ژ راستیا پەکەکێ کو چۆڤکێ د دەستێ دوژمنێن کوردان دە یە دزانە، لێ کەسێن مینا بەلاتینکا چارەمین یا کو د ناڤا ئاگر دە شەوتی و نەکاری ڤەگەرە راستیا ئاگر ب تەڤاهی ژ هەڤالێن خوە رە ببێژە، د ناڤا پەکەکێ دە نە هندکن، لێ مخابن ئەو د ناڤا پەکەکێ دە وەندابوونە و نکارن ڤەگەرن و راستیا پەکەکێ ژ هەر کەسی رە ببێژن.

پوستێن ھەمان بەش