ل ترکیێ ھەژمارا وەلاتیێن ئالمان یێن دەستەسەرکری، گھشتیە 122 کەسان و ھنەک ژ وان ژ بەر خەباتا وان یا ل سەر چاند و زمانێ کوردی، تێن تۆھمەتبارکرن.
حکوومەتا فەدەرال یا ئالمانیایێ د بەرسڤا پرسنامەیەکا پارلامەنتەرا پارتیا جەهەپێ «گۆکای ئاکبولوت» دا ئەشکەرە کر، ل ترکیێ 122 وەلاتیێن ئالمان دەستەسەرکری نە. نیڤێ وان د زندانێ دا نە و قەدەغەیا دەرکەتنا دەرڤەیی سینۆرێن ترکیێ ل سەر نیڤا دن ھەیە.
دەربارێ ڤێ مژارێ دا «گۆکای ئاکبولوت» ژ بۆ رۆژنەمەیا «دەر تاگەسسپەگەل» دیار کریە، گەلەک ژ وەلاتیێن ئالمان ژ بەر تەڤلیبوونا کۆمەلەیێن کوردان یان ژی رەخنەیێن ل حکوومەتا ترکیێ ھاتنە گرتن.
«ئاکبولوت» دا زانین ژی، د دەرھەقێ ھندەک وەلاتیێن ئالمان دا، تەنێ ب ھنجەتا کو وان ل سەر چاند و زمانێ کوردی کار و خەبات کرنە، بریارا گرتنێ ھاتیە دایین.
ل گۆری وێ رۆژنامەیێ، مەترسیا گرتنا ئالمانێن ل ترکیێ د دەمەک نێزیک دا دکارە ھین زێدەتر ببە، ژ بەر پارلامەنتۆیا ترکیێ نھا ل سەر یاسایا کو ژ بەر بەلاڤکرنا “نووچەیێن سەختە” 3 سال سزایێ گرتیگەھێ ددە، تێ نیقاشکرن.
شیرۆڤەکارێن سیاسی ژی، حکوومەتا ترکیێ سووجدار دکن کو ئەڤ یاسا ب ئاوایەکی نەزەلال ھاتیە دارشتن کو کەسەک ھەما ھەما ژ بەر ھەر رەخنەیەکێ یان دەربرینا رامانەکێ، دکارە بهێتە سزادان.
