ئاگر ب بەشەک ژ زیندانا ئەڤین یا ل تەھرانێ کەتیە و شەر د ناڤبەرا گرتیان و ھێزێن ئەولەھیێ دا دەرکەتیە، د ئەنجامێ دا 8 کەس بریندار بوونە.
مەدیایا فەرمی یا ئیرانێ “ئیرنا” بەلاڤ کر، دوھی ئاگر ب بەشەک ژ زیندانا ئەڤین یا ل تەھرانێ کەتیە و د ئەنجاما رووبرووبوونا د ناڤبەرا گرتیان و ھێزێن ئەولەھیێ دا، 8 کەس بریندار بوونە.
دەربارێ سەدەما دەرکەتنا ئاگر د ناڤا زیندانێ دا دیار کر، گرتیان ئێریشی کرن و ھێزێن ئەولەھیێ رێگری ل وان کرن و د ئەنجامێ دا ئاگر ب بەشێ جلووبەرگێن گرتیان کەتیە.
ل گۆری وێنە و ڤیدیۆیێن ل تۆرا جڤاکی بەلاڤ بوونە، دەنگێ تەقین و گولەیان ل دەردۆرا زیندانێ تێ بھیستن و ئاگرەک مەزن ب گرتیخانەیێ کەتیە.
زیندانا ئەڤین، ژ ناڤدارترین زیندانێن ئیرانێ یە و ھەژمارەک ژ چالاکڤان و پارێزەرێن ناڤدار یێن ئیرانێ د ڤێ زیندانێدانە.
