هەژمارەک پارتی و ئالیێن سیاسی یێن سووریێ ب رۆسیایێ رە جڤیان
هەژمارەک پارتی و ئالیێن سیاسی یێن سووریایێ ل باژارێ مۆسکۆ یا پایتەختا رووسیایێ ب میخائیل بۆگدانۆڤ جێهگرێ وەزیرێ دەرڤە یێ رووسیایێ رە جڤیان.
ل گۆر ئاگاهیێن تایبەت یێن پێگەها دارکا مازی، ئەڤ جڤین ل رۆژا 15/9/2022ان ل مۆسکۆیێ هاتیە ئەنجامدایین و نوونەرێن پارتیێن سیاسی یێن سووریێ کو د ڤێ جڤینێ دە ئامادە بوونە ئەڤ کەسە بوونە:
سیهانۆک دیبۆ و عەلی ئەلعاسی/ نوونەرێن جڤاتا سووریەیا دەمۆکراتیک.
خالد محامید/ جیهگرێ دەستەیا دانوستاندنا سووریەیا بەرێ.
عبەید نەحاس/ سەرۆکێ تەڤگەرا چالاکیا نشتمانییا سووریێ.
عادل سەعید/ نوونەرێ هەماهەنگیا نشتمانی.
حەسەن ئەلئەترەش/ نوونەرێ ئینسیاتیفا نەتەوی ل جەبەل ئەل عەرەب ل پارێزگەها سویدا.
د ڤێ جڤینێ دە باسی رەوشا سیاسی یا سووریێ هاتیە کرن، د جڤینێ دە تەکەزی هاتیە کرن کو دڤێ چارەسەریەک سیاسی ژ بۆی رەوشا سووریێ ل گۆر بریارا ناڤنەتەوی یا ژمارە 2254 وەرە دەستپێکرن هەیا کو پرسگرێک و ناکۆکیێن سووریێ وەرن چارەسەرکرن، هەر وەها هاتیە تەکەز کرن کو دڤێ ئەڤ چارەسەری ل سەر بنگەها دانوستاندنێن سووری-سووری بە.
هەر وها تەکەزی ل سەر وێ یەکێ کرن کو جیبجیکرنا بریارا 2254 یا نەتەوێن یەکبوویی ب ھەموو خال و ئەنجامێن وێ بنگەھا چارەسەریا سیاسییە و تەکەزی ل سەر یەکرێزیا ئاخ و گەلێ سووریێ کرن.
د ڤێ ھەڤدیتنێ دە جیگرێ وەزیرێ دەرڤەیێ رووسیا بۆگدانۆڤ، دیار کر کو رووسیا پشتگریا چارەسەریا سیاسی دکە، و بەرنامەیەکە ئامادەکری ژ بۆ چارەسەریێ نینە و دڤێ سووری ب خوە ھەڤاھەنگیێ د ناڤبەرا خوە دە بکن و نەرینا خوە بدن. ئارمانجا مە ئەوە کو ئەم ھەر کەسی ڤەخوینن، د سەری دە دەستھلاتداریا سووریێ و ل سەر بنگەھا بریارا ناڤدەولەتییا 2254 ل سەر ماسەیا دانووستاندنان روونن.
د جڤینێ دە ئەڤ پرس ژ بۆگدانۆڤ ھات کرن: گەلۆ دەستھلاتا سووریێ ب راستی ئۆپۆزیسیۆنا سووریێ ناس دکە؟ گەلۆ ھوون دکارن وێ رازی بکن کو ل سەر ماسەیا دانووستاندنان روونە و کار ژ بۆ بدەستخستنا چارەسەریەکە سیاسی ل گۆری ناڤەرۆکا بریارا 2254 یا نەتەوەیێن یەکبوویی و ھەموو خال و ئەنجامێن وێ بکە؟
بۆگدانۆڤ ب ڤی ئاوا بەرسڤا پرسێ دا: بەرسڤا پرسێن وە دێ بگھە وە، جڤینا د پاشەرۆژێ دە یا سووری-سووری ب ھەماھەنگی ل گەل وەزارەتا دەرڤەیا رووسیایێ دێ بۆ شامێ ب خوە وەرە ڤەگوھەستن.
ل گۆر ئاگاهیێن تایبەت یێن پێگەها دارکا مازی، ڤێ جڤینێ گەلەک پرسیار و ناکۆکی د نێڤبەرا ئەندامێن جڤاتا سووریەیا دەمۆکراتیک دە دروست کرنە، ب ئاوایەکی کو د گرووپا خوە یا تایبەت یا WhatsAppێ دە هن ئەندامان ب ڤی ئاوا نەرین و پێشنیازێن خوە دیار کرنە:
مەجدۆلین حەسەن: ئەنداما سەرکردایەتیا جڤاتێ و نیشتەجیا ولاتێ سووید.
سحەتا وە خوەش بە، د دەمەکی دە کو تەڤ جیهانێ رووسیا جەزا کریە و خستیە بن دۆرپێچێ دە و هەلوەستێن نەرینی ل همبەر نیشان ددن، هوون چوونە و وە فیزە وەرگرتیە و سەری ل رووسیایێ دانە، دوور نەبینن جیهان ب تەڤاهی دژاتیا وە بکە و دەرگەهێن خوە ژ وە رە ڤەنەکن.
بەسام سەقەر: ئەندامێ سەرکردایەتیا جڤاتێ و نیشتەجیێ ولاتێ ئامەریکا.
هەڤال مەجدۆلین، تەکید بە تەڤ ئالی ڤێ یەکێ دزانن، ت ئالیەک ت هەلوەستەکی ل دژی مە وەرناگرە، ژ بەر کو پێش ڤێ سەرەدانێ مە سەرەدانا ئامەریکایێ ژی کربوو.
جەمال شێخ باقی: سەکرەتەرێ پارتا دەمۆکراتا کوردی یا سووریێ.
مە ت تشتەک ژ ڤێ شاندەیێ فێم نەکر، ئەڤ شاندە سەر ب چ ئالیەکێ ڤە یە، نوونەراتیا کێ دکە، دبە گرووپەکە نوو بە هاتبە دروستکرن، مە ت ئاگاهیەک ل سەر تونەیە، چما وەزارەتا دەرڤە یا رووسیێ پێشەوازیێ ل شاندەیا جڤاتێ ب تەنێ ناکە، دبە ئەڤ شاندە شاندەیەک ناسکری نەبە.
ئامینا عۆمەر: هەڤسەرۆکا جڤاتا سووریەیا دەمۆکراتیک.
بریار بوو ئەڤ جڤین بەرا شەرێ رووسیا و ئوکراینایێ وەرە لدارخستن، لێ بەلێ هات پاشخستن، ت شاندەیەکە نوو نەهاتیە پێکئانین، جڤاتا سووریەیا دەمۆکراتیک تێکلی ب تەڤ ئالیان رە هەیە.
سیهانۆک دیبۆ: ئەنداما پێوەندیێن گشتی یا جڤاتا سووریەیا دەمۆکراتیک.
جڤینا کو ل رووسیایێ هاتیە ئەنجامدایین ب تەنێ دانوستاندن بوویە و مە ژ ئالیێ خوە ڤە و ب هەڤپاری ب بەشداربوویان رە پەیام گهاندیە رووسیایێ کو دڤێ چارەسەریەک سیاسی ل سووریایێ دەستپێبکە و نابە رێگری لێ وەرە کرن، کەسێن بەشداری د جڤینێ دە کرین هەماهەنگی ب جڤاتا سووریەیا دەمۆکراتیک رە هەیە، ئەم دخوازن تێکلیێن خوە ب رووسیایێ رە بهێز بکن، ژ بۆ ڤێ یەکێ ئەمێ سەری ل مۆسکیێ بدن، هەر وها ئەمێ سەری ل هن ولاتێن عەرەبی ژی بدن.
