میرێ کوردێن ئێزدی سەردانا شنگالێ کر
میر حازم تەحسین بەگ، میرێ کوردێن ئێزدی ل کوردستانێ و جیهانێ بۆ یەکەمین جار پشتی هلبژارتنا وی وەکە میرێ ئێزدیان، ئیرۆ ب سەردانەکێ چوو شنگالێ.
ل گۆری ئاگاهیێن رووداوێ، کاروانا میرێ کوردێن ئێزدی ئیرۆ بەر ب شنگالێ ڤە ب رێ کەت و دێ ل شنگالێ سەردانا چەند جهان بکە و هن هەڤدیتنان ب خەلکێ و کەسایەتێن ئێزدیێن دەڤەرێ رە پێک بینە.
کاروانا ئۆتۆمۆبیلێن میرێ کوردێن ئێزدی و شاندا پێ رە د بن پاراستنا هێزێن پێشمەرگە دە دەرباسی شنگالێ بوو.
میرێ ئێزدیان، میر حازم تەحسین بەگ و شاندا پێ رە ل گوندێ تل قەسەب ل باشوورێ شنگالێ ژ ئالیێ خەلکێ و کەسایەتێن کوردێن ئێزدی ڤە هاتن پێشوازی کرن.
کورێ میر حازم، ئەمیر حازم ئیرۆ پێنجشەمبێ 27 جۆتمەها 2022ان راگهاند، «میر حازم ئیرۆ بەر ب شنگالێ ڤە برێکەت و دێ سەردانا گوندێ کۆچۆ بکە، ل وێ دەرێ دێ مەراسیمەکە ئۆلی ل سەر گۆرستانا قوربانیێن جەنۆسیدێ یێن گوندێ کۆچۆ بێ ل دارخستن، پاشێ دێ سەردانا چەند کەسایەتێن شنگالێ بکە».
ل شنگالێ ژ بۆ پێشوازیکرنا میرێ کوردێن ئێزدی ئامادەکاری هاتنە کرن و میر حازم دێ ب هەژمارەک کەسایەتێن دەڤەرێ رە هەڤدیتنان بکە.
میر هازم تەحسین بەگ پشتی کۆچا داوی یا باڤێ خوە تەحسین بەگ، د شباتا 2019ان دە وەک میرێ ئێزدیێن ل کوردستانێ و جیهانێ هاتبوو دەستنیشان کرن، ژ وێ دەمێ ڤە ئەڤ جارا یەکەمینە کو سەردانا شنگالێ دکە.
