د 24ێ جۆتمەھا 2012ێ دا ل نێزیکی باژارێ دێرکێ یێ رۆژئاڤا 2 کەس ب ئاستەنگکرنا ترومبێلێن وان ھاتن رەڤاندن. یەک ژ کەسێن ھاتین رەڤاندن ژی ئەندامێ پۆلیتبورۆیا پەدەکە-سێ بەھزاد دورسون یەک ژ کەسایەتێن گرینگێن رۆژئاڤا بوو. دورسون دەما ھات رەڤاندن، نوونەرێ دێرکێ یێ ئەنجوومەنا نشتمانی یا کوردی بوو. ل کێلەکا وی پاسەوانێ وی نیدال سەلیم ھەبوو.
ھەر سال گەلێ دێرکێ ژ بۆ بەھزاد دورسون داخویانیەکێ بەلاڤ دکن و تێ دە دخوەزن کو چارەنڤیسا وی بهێت ئەشکەرە کرن. لێبەلێ، چارەنڤیسا وی نەدیارە.
کێ بەھزات دورسون رەڤاند؟
بەھزات دورسون ژ ئالیێ کۆمەکا سەر ب پەکەکێ ڤە ھات رەڤاندن. ئەڤ گرووپە ئەندامێن ھێزێن تایبەتێن باکورێ کوردستانێ یێن پەکەکێ بوون، لێ کارێ جوانان دکر. ئەڤ کۆمە راستەراست گرێدایی «شاھین کۆبانی» ئانکو مەزلووم عەبدی بوون. شاھین کۆمەک جوانێن رۆژئاڤا یێن کو ب خوە ژی نێزیکی وی بوون ل ڤێ کۆمێ زێدە کرن. ھەر وھا ئەڤ کۆم ل سەر ناڤێ ھەپەگێ ب باھۆز ئەردال ڤە ژی گرێدایی بوو.
ڤێ کۆمێ گەلەک مەھان بەرێ بەھزاد دورسون دشۆپاند. بەھزاد ل دێرکێ خوەدی باندۆر بوو. دێرک ژی یەک ژ وان ھەرێمان بوو کو پەدەکە-سە لێ خۆرت بوو. نێزیکی 80% گوندێن دێرکێ دلسۆزێن پارتیێن خوەجھی بوون. ب تایبەتی ژی بەھزاد دورسون کو د ڤی واری دا بەرپرسیار بوو، ھەم ژ ئالیێ ئابۆری، هەم ئالیێ جڤاکی ئەڤ گرسە ب رێخستن دکر. ل دۆرا وی جوان کۆم دبوون.
بەھزاد دورسون ژ بۆ بچە باشوورێ کوردستانێ ب ترومبێلا تۆیۆتا کو پاسەوانێ وی ل کێلەکا وی بوو ژ ھەرێما کۆچەراتا دەرباس دبوو. د ناڤبەرا گوندێن «شەکرخاچ و تەقلبقلێ» دا ترومبێلا وی دو کیلۆمەتران دووری سینۆری ھات راوەستاندن. یێن کو ترومبێلا بەھزاد دورسون راوەستاندی یەکینەیا تایبەتا پەکەکێ بوون. جل و بەرگێن سڤیل ل خوە کربوون و مینا کو ئالیکاریێ بخوازن راوەستیان. دووڤ را مرۆڤێن دنێن کو ل دۆرا رێ خوە ڤەشارتی ژ نشکا ڤە دەرکەتن سەر رێ. تیما پەکەکێ یا ژ 4 کەسان پێک دھات ژ بەھزاد خوەست کو ژ ترومبێلێ داکەڤە. بەھزاد قەت باوەر نەدکر کو تشتەک خراب ببە. مینا سۆحبەتەکا نۆرمال نێزیک بوو. ژ وی ھات خواستن کو دەرباسی کێلەکا رێ ببە. دەما بەھزاد گۆت مافێ وە نینە، کۆمێ گولـلە ل وی و پاساوانێ وی رەشاندن و ھەر دو ژی گولـلەباران کرن. جەنازە یەکسەر ل قەراغا ئاڤا دیجلەیێ کو رۆژئاڤا ژێ رە دگۆتن ئاڤا مەزن، ھاتن دەفنکرن.
ئەو دەڤەرەکا بەرفرەھە و ب دەھان گوندێن کۆچەرێن گرێدایی ھەرێما کۆچەراتا و بۆریا پەترۆلێ د گەلەک گوندان را دەرباس دبە. پەکەکە ب سالانە د ڤێ ھەرەمێ دا خوەدی باندۆرە. ئەسەد د سالا 1991ێ دا دەستوور دابوو پەکەکێ کو سینۆر ب کار بینە و لەشکەرێن سورییێ ژ سینۆر ڤەکشاندبوو. ھەر ھەفتە ھێزێن پەکەکێ ژ ڤر ب رێک و بەلەمان دەرباسی دەڤەرا چیایێ سپی، باشوورێ کوردستانێ دبوون. دەما کو بەھزاد دورسون ھاتی تەرۆر کرن، ھێزێن پەکەکێ ل ھەرێمێ بنکەیێن کۆنترۆلێ دانی بوون.
نھا ژی مەزلووم عەبدی ل سەر پەیەدێ و پارتیێن دن رۆلا مرۆڤەکی مەعقوول یێ لھەڤگر دلیزە. ل ئالیێ دن پارتیێن رۆژئاڤا ھەر تم بانگ ل وی دکن. لێ بەرپرسیارێ ھەموو کریارێن نەدیار، رەڤاندنا کەسێن سییاسی، کوشتن و شەوتاندنا مەزلووم عەبدی ب خوەیە.
