سەرۆککۆمارێ ترکیێ رەجەب تەییب ئەردۆگان د گۆتارا خوەیا د جڤینا “ڤیزیۆنا سەدسالا ترکیێ” دا راگھاند، ئامادەکرنا دەستوورەکە نوو ژ بۆ ترکیێ یەک ژ ئارمانجێن وانێن سەرەکەیە.
سەرۆککۆمارێ ترکیێ ل باژارێ ئەنقەرە یێ ترکیێ، جڤینەکە ب ناڤێ “ڤیزیۆنا سەدسالا ترکیێ” ساز کر و دەربارێ کارێن کو ل ترکیێ د دەستھلاتا پارتیا وی دا ھاتنە کرن ئاخڤی و بەحسا ئارمانجێن خوەیێن د سەدسالا نوویا دامەزراندنا کۆمارا ترکیێ دا کرن.
رەجەب تەییب ئەردۆگان گۆت کو وان د دەما دەستھلاتا خوە دا ملیۆنەک و 170 یەکەیێن نشتەجھبوونێ ئاڤاکرنە و گۆت: “مە نووژەنکرنا 3 ملیۆن یەکەیێن نشتەجھبوونێ ژی تەمام کر. ب ڤێ یەکێ ژی 12 ملیۆن وەلاتیێن مە ب ئاوایەک ئەولە د یەکەیێن نشتەجھبوونێ دا دژین.”
ئەردۆگان راگھاند کو وان د دەستھلاتا خوە دا گەلەک پرۆژە و کارێن گرینگ ژ بۆ ترکیێ کرنە، لێ وان نکاریە دەستوورا ترکیێ بگوھەرن و گۆت، “ئامادەکرنا دەستوورەکە نوو ژ بۆ ترکیێ یەک ژ ئارمانجێن سەرەکەیێن ڤیزیۆنا مەیا سەدسالا ترکیێ یە.”
ھەروھا گۆت: “تەڤی کو د دەما حکوومەتێن مە دا، مە گەلەک گوھەرین د دەستوورێ دا کرنە ژی، لێ ھەتا نھا کێماسی ھەنە. دەما ڤێ دەستوورا دەربەیا 12ێ ئیلۆنێ ژ زوو دا تەمام بوویە، کو خزمەتا زۆرداریێ دکە. ھەولێن مە ژ بۆ ژ نوو ڤە ئامادەکرنا دەستوورێ بەردەوام بوون، لێ ژ بەر ئامادەنەبوونا ئالیێن ئۆپۆزیسیۆن ھەولێن مە ب سەر نەکەتن. ھەبوونا دەستوورەکە نوو ژ بۆ وەلاتێ مە یەک ژ ئارمانجێن ھەری سەرەکەیێن ڤیزیۆنا مەیا سەدسالا ترکیێ نە.”
