کۆنسولخانەیا ئه‌مه‌ریكا ل هەرێما کوردستانێ ل سەر رەوشا شنگالێ داخویانیەک بەلاڤ کر و تێدا راگه‌هاند، ئالۆزیا شنگالێ كارتێكرنه‌كا خراب ل سەر سەکتۆرا پەروەردێ کریە و پرۆسەیا ئاساییکرنا رەوشا وێ دەڤەرێ گەلەکی خەمساری برێڤە دچیت.
کۆنسولخانەیا گشتی یا ئه‌مه‌ریكا ل هەولێرێ ئیرۆ 30ی جۆتمەها 2022ێ د داخویانیەکێ دا راگه‌هاند: «ل شەنگالێ پۆلێن خواندنێ گەلەکی قەلەبالخن و کەرەستە و پێدڤیێن خواندنێ ژی نینن، پێشخستنا پەروەردەیێ یەک ژ کارێن هەری پێشینەیە بۆ پێکهاتەیێن شنگالێ».
دەربارێ هەڤکاریێن ئه‌مه‌ریكا بۆ شنگالێ، کۆنسولخانەیا ئه‌مه‌ریكا دبێژیت: «دەزگەها گەشەپێدانا ناڤدەولەتی یا ئه‌مه‌ریكی (USAID) هەری داوی ب سازیا STEP ژ بۆ پێشخستن و پەروەردێ ب هەڤبەشی هەڤکاری کرن دا کو 2 هەزار ماسەیێن خواندنێ ل شنگالێ چاک بکه‌ن و 22 کەسێن ل ده‌ڤه‌رێ کو د ناڤ وان دا گەلەک ژن ژی هەنە وی کاری دکه‌ن».
دا زانین ژی، « STEPژ نێزیك ڤە ل گه‌ل وەزارەتا پەروەردێ کار دکەت ژ بۆ بەلاڤکرنا ماسەیان ل 31 خواندنگه‌هێن شنگالێ».
د جۆتمەها 2020ێ دا هەولێرێ و بەغدایێ د بن چاڤدێریا نوونەرێ نەتەوێن یەکگرتی ل ئیراقێ رێكکەفتنەک ژ بۆ ئاساییکرنا رەوشا شنگالێ ئیمزا کرن، خالێن گرنگێن ڤێ رێکكەفتنێ ژی، ڤه‌كێشانا هەموو هێزێن چەکدارێن نەیاسایی ژ شنگالێ، دابینکرنا ئارامی و ئەولەهیێ، ئاڤادانکرن و ڤەگەراندنا کۆچبەران و دەستنیشانکرنا قایمەقامەکی نوویە.
جیبجیکرنا رێکكەفتنا شنگالێ یەک ژ خالێن کارنامەیا سەرۆکوەزیرێ نوویێ ئیراقێ محەمەد شه‌یاع سوودانی یە، ل گۆری کارنامەیێ ژی دڤێت ئەولەهی و ئارامی ل ناڤچەیا شنگالێ بهێته ڤەگەراندن.
