ل پرانیا پارێزگەهێن باکورێ کوردستانێ ئۆپەراسیۆنێن ئارتێشا ترکیێ بەردەوامن، وەزارەتا ناڤخوە یا ترکیێ راگهاند کو ئارتێشا وان ل پارێزگەها چەولیگێ یا باکورێ کوردستانێ، ئۆپەراسیۆنەکا لەشکەری دایە دەستپێکرن.
وەزارەتا ناڤخوە یا ترکیێ ئیرۆ دوشەمبێ 31ێ جۆتمەها 2022ێ راگهاند کو ل ناڤچەیا دارا هێنێ سەر ب پارێزگەها چەولیگێ ل دژی په‌كه‌كێ «ئۆپەراسیۆنا پاییز-زڤستان-7 ئەرەن دۆرپێچ» هاتیە دەستپێکرن.
وەزارەتا ناڤبووری راگهاندیە کو دێ ئۆپەراسیۆن ل ناڤچەیا دارا هێنێ، ژ ئالیێ فەرمانداریێن جەندرمەیێن چەولیگێ ڤە بێ برێڤەبرن و 464 جەندرمەیێن هێزێن تایبەت، پۆلیسێن هێزێن تایبەت، کۆماندۆ و جەردەڤان بەشدار ببن کو ژ 40 تیمان پێک تێن.
بەری چەند رۆژان ل پارێزگەهێن دێرسمێ و جۆلەمێرگێ ژی ب هەمان ناڤی ئارتێشا ترکیێ ئۆپەراسیۆن دابوون دەستپێکرن کو هەتا نها ژی بەردەوامن.
