سازیا مافێن مرۆڤان یا ئیرانێ (IHR) راگهاند کو د خوەپێشاندەنێن ل رۆژهلاتێ کوردستانێ و ئیرانێ دا هەژمارا خوەپێشاندێرێن هاتن کوشتن بۆ 253 کەسان زێدە بوو.
سازیا مافێن مرۆڤان یا ئیرانێ کو ناڤەندا وێ ل نۆرویجێ یه، د راپۆرتەکێ دا راگهاند کو د خوەپێشاندانێن ل رۆژهلاتێ کوردستانێ و ئیرانێ دە هەتا نها 253 خوەپێشاندەر هاتنە کوشتن.
د راپۆرتێ دا کو ل 28ێ مه‌ها بۆری هاتیە بەلاڤکرن، ژ 31 پارێزگه‌هێن ئیران و رۆژهلاتێ كوردستانێ، دەربارێ 21 پارێزگه‌هان ئامار هەنە و هات دیارکرن کو کوشتی هەری زێدە ل پارێزگه‌ها سیستان-بەلوجستانێ نە کو پرانی سونی لێ دژین.
ل گۆری راپۆرتێ ل پارێزگه‌ها سیستان – بەلوجستانێ 93، ل مازەندەرانێ 30، ل تەهرانێ 25، ل کوردستانێ 23، گلانێ 19، ئازەربەیجانا رۆژئاڤا 18، کرمانشانێ 13، ئەلبۆرزێ 7، خۆراسانێ رەزەوی 4، ل ئیسفەهانێ 3، مەرکەزی، قەزوین، کۆهگلویە-بوویەر ئەحمەد، زەنجان و ئازەربەیجانا رۆژهلات، ئەردەبیل و ئیلامێ 2 کەس، بوشەهر، خۆزستان، هەمەدان و سیمنانێ ژی هەر یەک ژێ خوەپێشاندەرەک هاتنە کوشتن.
هات گۆتن کو ژ خوەپێشاندێرێن کو جانێ خوە ژ دەست دانە 34 ژ وان زارۆکن کو ژ 18 سالی بچووکترن و 19 ژ وان ژنن.
سازیا مافێن مرۆڤان یا ئیرانێ د راپۆرتا خوە یا د 12ێ جۆتمەهێ دا ژی راگهاندبوو کو د خوەپێشاندانێن پشتی جانژدەستانا کەچا کورد ژینا ئەمینی دەست پێ کرن دا ژ بەر موداخەلەیا هێزێن ئەولەهیێ 201 خوەپێشاندێر هاتنە کوشتن.
د نووچەیا ئاژانسا چالاکڤانێن مافێن مرۆڤانا ئیرانێ (ئێرنا) دا ژی هات دیارکرن کو د خوەپێشاندانێن دە هەتا نها 36 کەسێن ئەندامێن ئەولەهیێنە هاتنە کوشتن.
خوەپێشاندانێن ل رۆژهلاتێ کوردستانێ و ئیرانێ
کەچا کورد ژینا ئەمینی یا 22 سالی یا کو د 13ێ ئیلۆنێ دا ل تەهرانێ پشتی کو ژ ئالیێن دەوریەیێن پۆلیسێن ئەخلاقێ ڤە هات دەستەسەرکرن کەتە کۆمایێ و راکرن نەخوەشخانەیێ د 16ێ ئیلۆنێ دا ژیانا خوە ژ دەست دا و جانژدەستانا ئەمینی ل سەرانسەرێ رۆژهلاتێ کوردستانێ و ئیرانێ ببوو سەدەما خوەپێشاندانێن دژی رێڤەبریا ئیرانێ.
هەروها تێ ئیدیعاکرن کو د خوەپێشاندانان دا پێتری 10 هەزار كه‌سان هاتنه دەستەسەر کرن.
