رێخستنا مافێن مرۆڤان یا ئیرانێ راگھاند، د ناڤا 45 رۆژێن خوەپێشاندانێن ئیرانێ دا، ھەری کێم 277 خوەپێشاندەر ھاتن کوشتن، کو ژ وان 40 کەس زارۆک و 24 کەس ژنن.
ئیرۆ چارشەمێ 2یێ مژدارێ، رێخستنا مافێن مرۆڤان یا ئیرانێ کو ناڤەندا وێ ل وەلاتێ نەرویجێ یە، راگھاند: “ل 22 پارێزگەھان کوشتی ھەنە و پرانیا وان ل گۆر رێزبەندێ وسایە: پارێزگەھێن سیستان، بەلووجستان، مازندەران، تەھران، سنە و گیلان.”
ل گۆر راپۆرتێ، ژ وان 40 کەسێن کو ھاتنە کوشتن و تەمەنێن وان ژێر 18 سالی نە، 9 کەس کەچن.
رێخستنا کو د دەما 45 رۆژێن بۆری دا ب ئاوایەکی بەردەوام ئامارێن قوربانیێن خوەپێشاندانێن ئیرانێ بەلاڤ دکە، ئەشکەرا کر کو ھەژمارا راستی یا کوشتیێن خوەپێشاندانان، ژ ئامارێن بەلاڤکری زێدەترە.
ھەروھا مالپەرا «ھرنا» د راپۆرتەکێ دا راگھاندیە، د دەما خوەپێشاندانان دا 288 کەس ھاتنە کوشتن، کو ژ وان 48 کەس زارۆکن.
خوەپێشاندانێن خەلکێ ئیران و رۆژھلاتێ کوردستانێ ژ بۆ شەرمەزارکرنا کوشتنا ژینا ئەمینی، رووبروویی کارڤەدانا توندا ھێزێن ئەولەھیا ئیرانێ بوو، لێ بەلێ ھەتا نھا ئامارێن ب ھوورگلی یێن ل سەر ھەژمارا کوشتی، بریندار و دەستەسەرکریان تونەیە.
سەرۆکێ دادگەھا پارێزگەھا تەھرانێ عەلی قاسی رۆژا 31ێ جۆتمەھێ، بەحسا دەستپێکرنا لێپرسینێ بۆ ھەزار کەسێن خوەپێشاندانێن تەھرانێ کربوو.
ژ بلی وێ ئامارێ، دەستھلاتا دادوەری یا ئیرانێ راگھاند، د پێوەندیا لگەل خوەپێشاندانان دا “25 لێپرسین ل پارێزگەھا کرمان، 89 ل پارێزگەھا سمنان، 119 ل پارێزگەھا زەنجان، 105 ل پارێزگەھا خوزستان، 55 ل پارێزگەھا قەزوین، 110 ل پارێزگەھا سنە و 201 ل پارێزگەھا ئەلبورز ھاتنە ڤەکرن”.
