مەلایێ ناڤدار یێ بەلووچیێن ئیرانێ مەولەوی عەبدولحەمید د گۆتارا نڤێژا ئەینیێ دا دیار کر کو “پرانیا خەلکێ ئیرانێ نەرازی نە” و گۆت: “ئەگەر بکارن، ب ئامادەبوونا چاڤدێریا جیھانی رەفەراندۆمێ برێڤە ببن و ئەنجام ژی ھەر چ بیت، قەبوول بکن.”
مەولەوی عەبدولحەمید ل باژارێ زاھیدان یێ ئیرانێ د گۆتارا ئەینیێ دا گۆت: “نکارن ب کوشتن، گرتن و لێدان، خەلکێ پاشڤە ڤەکشینن کو زێدەتری 50 رۆژن خوەپێشاندانێ دکن.”
عەبدولحەمید گۆت: “چما ژن سەرپۆشێن خوە دشەوتینن؟ سەرپۆش بەشەک ژ چاندا ئیرانی و ئیسلامێ یە. کێ ئەو ژن ھێرس کرنە؟ وان ژنان چ زلم و زۆرداری دیتنە کو وسا سەرپۆشێن خوە دشەوتینن؟ گەلۆ ھوون دکارن ب زۆرێ خەلکێ ببن بھەشتێ، دڤێ بزانن نە شیعە و نە سوننە ب زۆرێ ناچن بھەشتێ. داخوازا خەلکێ جێبەجێ بکن، ئەڤ بنگەھ و رێیا سەرەکەیە.”
زاھیدان ناڤەندا پارێزگەھا سیستان و بەلووچستانە و زێدەتری 600 ھەزار بەلووچ ل وێ دەرێ دژین. ئەو پارێزگەھ دکەڤە باشوورێ ئیرانێ و لگەل وەلاتێن ئەفغانستان و پاکستانێ ھەڤسینۆرە.
بەریا مەھەکێ، پشتی تەمامبوونا نڤێژا ئەینیێ مەولەوی عەبدولحەمید، خەلک ژ بۆ شەرمەزارکرنا “دەستدرێژیا سەکسی یا فەرمادارەکی ھێزێن ئینتیزامی بۆ سەر کەچەکێ” کۆم کرن، لێ بەلێ ھێزێن ئەولەھیێ تەقەیێن راستەراست ل وان کرن و د ئەنجامێ دا نێزیکی 100 کەس ھاتن کوشتن و ب دەھان کەسێن دن ژی بریندار بوون.
