د خوەپێشاندانێن پشتی نمێژا ئینێ یا ل باژارێ خاشێ یێ پارێزگه‌ها سیستان بەلووجستانا ئیرانێ دا، هەژمارا کەسێن کو د ئەنجاما دەستوەردانا هێزێن ئەولەهیێ یا ل هەمبەری خوەپێشاندەران دا ژیانا خوە ژ دەست دان گه‌هشت 16 كه‌سان.
ل گۆری داخویانیا نڤیسکی یا ل سەر رووپەلا تلێگرامێ یا مەلایێ سوننەیێ ئیرانێ مەولەوی عەبدولحەمید ئیسماعیلزەهی، د خوەپێشاندانێن باژارێ خاشێ دا هەری کێم 16 کەسان ژیانا خوە ژ دەست دانە و ب دەهان کەس ژی بریندار بوونە.
د داخویانیێ دا رەخنە ل بکارئانینا هێزا بێ هەڤسەنگ ژ ئالیێ هێزێن ئەولەهیێ ڤە تێ کرن و گۆت «گرسەیا کو ل بەر ئاڤاهیا پارێزگاریا خاشێ کۆم بوو ب قیرینا درووشمەیان و کەڤر ئاڤێتن ئاڤاهیێ، هێزێن ئەولەهیێ بەرسڤا کەڤرێن ئاڤێتنێ دا و گوللـە ل خوەپێشاندەران رەشاندن».
مەلایێ نمێژا ئینێ ئیسماعیلزەهی یێ باژارێ زاهیدانێ کو نێرینێن وی د داخویانیێ دا جهـ گرتنە وها گۆت:
«ل خاشێ هەری کێم 16 کەس مرن و ب دەهان کەس ژی بریندار بوون. نایێ زانین چما هەلوەستا پۆلیسێن پارێزگەها سیستان-بەلووجستانێ ژ پارێزگەهێن دن جوداترە، ل ڤێ پارێزگەهێ مرۆڤ بێ مەرحەمەتی تێن کوشتن و د ناڤا خوینێ دە دهێلن».
دوهـ رۆژا ئینیا بخوین ل باژارێ زاهدانێ، ئیرۆ کارەساتا ب خوینا ل باژارێ خاشێ زولمێن مەزنێن و جوداکاریێ دەردخە هۆلێ، ئەز ڤێ کارەساتێ شەرمەزار دکم، ژ مالباتێن کەسێن ژیانا خوە ژ دەست دانە رە سەرساخیێ دخوازم».
رێخستنا چالاکڤانێن بالووج راگهاندبوون کو د بوویەرێن ل خاشێ دا کەسەکی ژیانا خوە ژ دەست دایە!.
