هەژمارا بەرپرسێن پەکەکێ یێن کو خوە رادەستی ترکیێ دکن رۆژ ب رۆژ زێدە دبە، هەری داوی دو بەرپرسێن دارایی یێن پەکەکێ ل رۆژئاڤا کوردستانێ خوە رادەستی ترکیێ کرنە و زانیاریێن هەر ی گرینگ ل سەر پەکەکێ ب ترکیێ داینە.
ل گۆر ئاگاهیێن تایبەت یێن پێگەها «دارکا مازی» دو ژنە بەرپرسێن پەکەکێ یێن ب ناڤێن «شەرڤین و زیلان» کو بەرپرسیارێن دارایی یێن YPJێ بوون ل قامشلۆیێ، ل رێکەفتی 18/9/2022یێ ب شەڤ خوە رادەستی میتا ترکیێ کرنە.
چڤکانیێن مە ئەشکەرە کرن، «شەرڤین و زیلان» ل دەمژمێر نێزیکی 02:00یی شەڤێ ب ترومبیێلا خوە یا ژ جورەیێ هوندا-سانتافی ل گوندێ «بانۆکیێ» یێ سەر ب دێرکێ ڤە د نێڤبەرا سینۆرێ رۆژئاڤا و باکورێ کوردستانێ دە خوە رادەستی میتا ترکیێ کرنە، دەما نێزکیی سینۆرێ ترکیێ دبن هێزێن لەشکری یێن ترکیێ دیوارێ ب کۆنکرێتی ل سەر سینۆر هاتیە چێکرن راکریە و پێشوازی ل ڤان دو ژنە بەرپرسێن پەکەکێ کرنە.
چاڤکانیێن مە هەر وەها تەکەز کرن، شەرڤین و زیلانێ زانیاریێن هەری هەستیار دەربارا پەکەکێ وەکە کەسێن ئالیکاریا پەکەکێ دکن، چاڤکانیێن وێ یێن دارایی، هەژمارا هێزێن وێ، جیێ بەرپرسێن پەکەکێ یێن بلند و هتد… ب خوە رە برنە و ب میتا ترکیێ دانە.
ئەڤ د دەمەکی دە یە کو پەکەکە بەردەوام پارتیێن دن یێن کوردستانێ وەکە پەدەکێ ب ڤێ یەکێ تاوانبار دکە کو پێوەندی ب ترکیێ رە هەنە و زانیاریێن ل سەر پەکەکێ ب دەولەتا ترکیێ ددن، لێ پەکەکە ب خوە و ب هن رێیێن جودا زانیاریان ددە دەولەتا ترکیێ و پشترە پارتیێن دن تاوانبار دکە، یەک ژ ڤان رێیان ژی ئەڤە کو دەم ب دەم هندەک ژ بەرپرسیارێن پەکەکێ خوە تەسلیمی ترکیێ دکن و زانیاریێن هەری هەستیار ب میتا ترکیێ ددن.
