ئالمانیا و ئامەریکا ئێریشێن ئیرانێ یێن ل سەر ھەرێما کوردستانێ شەرمەزار کرن

ئالمانیا و ئامەریکا ئێریشێن ئیرانێ یێن ل سەر ھەرێما کوردستانێ شەرمەزار کرن

هەر یەک ژ ئالمانیا و ئامەریکا ئێریشێن سوپایێ پاسدارێن ئیرانێ ل سەر ناڤچەیێن ھەرێما کوردستانێ شەرمەزار دکن و ژ تەھرانێ داخواز دکن رێزێ ل یەکپارچەبوونا ئاخ و سەروەریا ئیراقێ بگرە.

ئیرۆ دوشەمێ 14ێ مژدارا 2022یێ، هەر یەک ژ کۆنسولخانەیا ئالمانیا و کۆنسولخانەیا گشتی یا ئامەریکایێ ل ھەولێرێ ئێریشێن ئیرانێ یێن سەر بارەگەھێن پارتیێن رۆژھلاتێ کوردستانێ یێن ل ھەرێما کوردستانێ شەرمەزار کرن و داخواز ژی کر کو دەملدەست ئەو ئێریش وەرن راوەستاندن.

کۆنسولخانەتا ئالمانیا یا ل ھەولێرێ ل سەر حەسابا خوە یا تویتەرێ راگھاند: “ئەم ئێریشا دوبارە یا مووشەکی و فرۆکەیێن بێ فرۆکەڤانێن ئیرانێ ل سەر ھەرێما کوردستانێ شەرمەزار دکن. ئەم ژ ئیرانێ داخواز دکن، رێزێ ل یەکپارچەبوونا ئاخ و سەروەریا ئراقێ بگرە، دڤێت ئێریش دەملدەست وەرن راوەستاندن.”

هەر وها ژ ئالیێ خوە ڤە کۆنسولخانەیا گشتی یا ئامەریکایێ ل هەولێرێ داخویانیەک د ڤێ دەربارێ دا پارڤە کر و تێدە راگهاند، “ئامەریکا ئێریشا مووشەکی و فرۆکەیێن بێ فرۆکەڤان یا ئیرۆ ل سەر ھەرێما کوردستانێ ب توندی شەرمەزار دکە و داخواز ژ ئیرانێ دکە ئێریشێن خوە ل سەر جیران و خەلکێ ئیراقێ راوەستینە.”

ھەروھا راگەھاند: “ملێ مە ل گەل ملێ رێڤەبەرێن حکوومەتا ئراقێیە ل بەغدا و ھەرێما کوردستانێ و ئەم ڤێ بنپێکرنا سەروەریا ئیراقێ شەرمەزار دکن.”

ئیرۆ دانێ سپێدێ 14ێ مژدارێ بارەگەھێن پارتیا دەمۆکراتا کوردستانا ئیرانێ ل کۆیە و بارەگەھێن کۆمەلەیا زەحمەتکێشان یا کوردستانا ئیرانێ ل گوندێ زرگوێزێ سلێمانیێ راستی ئێریشان ھاتن. ل گۆری زانیاریان ھەتا نھا 2 کەس شەھید بوونە و 8 کەسێن دن ژی بریندار بوونە.

پوستێن ھەمان بەش