ئەشکەرە بوو کی چالاکیێن ل دژی پەکەکێ ل سلێمانیێ ئەنجام ددە
د دەما چەند مەهێن بۆری دە چەندین چالاکی ل دژی کادرۆیێن پەکەکێ ل باژارێ سلێمانیێ یێ باشوورێ کوردستانێ وەکە کوشتن و ئاڤێتنا بۆمبەیان بۆ ناڤا مالێن وان هاتنە ئەنجامدایین، ئەڤ یەک ژی بوو سەدەما نیقاشێ د ناڤبەرا گەلێ باشوور دە.
رووپەلا «دارکا مازی» د ڤێ راپۆرتا خوە دە, دێ هەول بدە پەردە ل سەر هن راستیێن د دەربارا ڤان زنجیرە چالاکیێن ل دژی کادرۆیێن پەکەکێ دە لادە و راستیا ڤان کریاران ئەشکەرە بکە.
ل گۆر زانیاریێن تایبەت یێن کو خەباتکارێن «دارکا مازی» ل چاڤکانیێن خوە ل سلێمانیێ ب دەست خستنە، د شەش مەهێن بۆری دە، هەژمارەک کارێن ئیستخباراتی ل دژی بەشەکی ژ ئەندام و کادرۆیێن پەکەکێ ل سلێمانێێ هاتنە ئەنجامدایین، ئەڤ ئەندام و کادرۆیێن پەکەکێ بەرێ ب بریارا “لاهۆر شێخ جەنگی” ل سلێمانیێ هاتنە ب جيهـ کرن و جیهێ مانێ ژ بۆی وان هاتیە دابینکرن، لێ پشتی لەکۆلینکرنا برێڤەبەریا گشتی یا ئاسایشا سلێمانیێ ل سەر ڤێ مژارێ و گرتنا هەژمارەک ئەندامێن پەکەکێ، ئەڤ یەک ئەشکەرە بوو کو پەکەکە ب خوە بەشەک ژ ڤان کاران ئەنجام ددە.
بۆ میناک:
ل مەها 4/2022یێ چەندین بۆمبەیێن دەستی هاتنە ئاڤێتن ژ بۆ ناڤا مالەکی ل تاخا “ئیبراهیم ئەحمەد” کو جیهێ رازانا هەژمارەک چەکدارێن پەکەکێ بوو، پشتی لەکۆلینا ژ ئالیێ ئاساییشا گشتی یا سلێمانیێ ڤە هاتیە کرن، هەر یەک ژ «شۆخان محەمەد حامد، ساکۆ سمکۆ محەمەد، چینەر شێرکۆ عەبدولرەحمان، وائیل عەبدوللا گلی، ئەلند تەییب ئەحمەد، سەلمان داود ئلیاس و محەمەد نەورۆز» ئەندامێن «تەڤگەرا ئازادی» یا سەر ب پەکەکێ ڤە ل سلێمانیێ ژ ئالیێ هێزێن ئەولەهیێ ڤە هاتنە دەستەسەرکرن، و ووسا هات ئیسباتکرن کو ڤان کەسان ئەڤ کار ئەنجام دایە.
هەر وەها د لەکۆلینێن ئاساییشا سلێمانیێ دە هاتیە ئیسبات کرن کو ڤان کەسان چ پێوەندی ب میتا ترکیێ ڤە تونە، بەلکو پێوەندی ب سازیا ئیستیخباراتا پەکەکێ ل قەندیلێ هەیە و ئەڤ کار ژ بۆی قەندیلێ ئەنجام دایە. ل گۆر ئاگاهیێن پشتراستکری ئەڤ کەسانە تەڤ ب بریارا دادوەر ل مەها 8/2022 ب کەفالەت هاتنە ئازادکرن.
پشتی تەرۆرکرنا ناگیهان ئاکارسەل کو ل 4/10/2022یێ ل تاخا بەختیاری یا باژارێ سلێمانیێ هاتیە تەرۆرکرن، کەسەک ب ناڤێ «کارمەند کەمال نوورەدین» کو ئەندامێ «رێخستنا ڤەژینا گەنجان» یا سەر ب پەکەکێ ڤە ژ ئالیێ هێزێن ئەولەهیێ یێن سلێمانێێ هاتیە گرتن، پشتی لەکۆلینێ ئەشکەرە بوویە چ تێکلیێن ڤی کەسی ب میتا ترکیێ رە تونە، بەلکو ژ ئیستیخباراتا پەکەکێ یا ل قەندیلێ رە کار کریە و ئەڤ کارە ب بریارا قەندیلێ ئەنجام دایە، تەڤی کو کارمەند هەیا نها دانپیدان ب تەرۆرکرنا ناگهیان ئاکرسەل نەکریە، لێ بەلێ، دانپیدان کریە کو ئالیکاریا کوژەرێ ناگیهانێ کریە.
هەر وەها ل گۆر ئاگاهیێن تایبەت یێن رووپەلا «دارکا مازی»، د مۆبایلا کارمەند دە هەژمارەک تۆمارێن دەنگی یێن جڤینێن نهێنی یێن پەکەکێ ل سلێمانیێ ب دەست هێزێن ئاساییشێ کەتنە.
ئەڤ یەک د دەمەکی دە یە کو پەکەکە بەردەوام هێزێن سیاسی یێن باشوورێ کوردستانێ ب تایبەت پەدەکێ ب کوشتنا ئەندام و کادرێن خوە و پێدانا زانیاریان ب دەولەتا ترکیێ تاوانبار دکە، لێ بەلێ، ل گۆر لەکۆلینا برێڤەبەریا گشتی یا ئاساییشا سلێمانیێ و ل گۆر بەلگەیێن بەردەست پەکەکە ب خوە ب ڤان کاران رادبە، ئارمانجا پەکەکێ یا سەرەکە ژ ڤان کاران ژی، تاوانبارکرنا حکوومەت و پارتیێن سیاسی یێن باشوور ب ئالیکاریکرنا ترکیێ و تەسفیەکرنا هندەک ژ ئەندامێن خوە یە، هەیا کو ب ڤێ یەکێ ئالۆزیان ل باشوورێ کوردستانێ دروست بکە.
