وەزیرێ ناڤخوە یێ ترکیێ سولەیمان سۆیلو پشتی ئێریشا ل تاقسیما ستەنبۆلێ سەرساخیا ئامەریکایێ رەد کر و سەرۆککۆمار رەجەب تەییب ئەردۆگان ژی ژ بۆ سەرساخیێ سپاسیا ئامەریکایێ کر.
د جڤینا فراکسیۆنا مەھەپێ دە سەرۆکێ گشتی یێ مەھەپێ دەولەد باخچەلی دا خویاکرن کو پەیامێن سەرساخیێ یێن ئامەریکایێ نە راستن و دەرەوین نرخاند.
ئالیکارێ سەرۆکێ گشتی یێ کۆما ئاکەپێ بولەنت توران پشتی ڤێ ھەلوەستا جودا داخویانی دا و گۆت، “وەزیرێن مە گەلەک ب قیمەتن، لێ دڤێ ئەم ل جھێ کو سەرۆکێ مە لێ رادوەستە، بسەکنن.”
وەزیرێ چاند و توریزمێ یێ بەرێ و یەک ژ پارلەمەنتەرێن بەرێ یێ ئاکەپێ ئەرتوگرول گونای دەر بارێ مژارێ دە ژ رۆژنامەیا ئانت رە ئاخڤی و گۆت، “برێز سۆیلو و ھەڤکارێ بچووک یێ حکوومەتێ برێز باخچەلی، ھەلوەستا خوە دە ژ مەلیک مەلیکترن. ئەو ل شوونا کو ب ئارامی نێزکی مژارێ ببن، ب زمانەکی تووژ نێزکی ھەر پرسگرێکەکی دبن ئەڤ تەرجیحا وانە. گونای دبێژە کو، “ئەو ل ڤی وەلاتی نەرەحەتیێ چێدکە و جارێ دەستھلاتێ تێخە تەنگاسیێ دە.”
گونای بەردەوامیا داخویانیا خوە دە دبێژە: وان سووجدارکرنێن پر تووژ و خەمگین کرن کو ب تو دەلیلان نەھاتن پشتگری کرن. برێز سەرۆککۆمار ژی ھەلوەستا کو دڤێ رایەدارەکی دەولەتێ نیشان بدە گرت و سپاسیا ھەموو کەسێن کو سەرساخی خوەستنە کر. دەما کو ئەم ژ ڤر لێ دنێرن، پر ئەشکەرە تێ دیتن کو ناکۆکیەک کوور یا رامانان، جوداھیا نێرینێ ل سەر جیھانێ ھەیە.
دەما ئەم ل سالێن بەرێ یێن پارتیا داد و گەشەپێدانێ دنێرن، د ناڤبەرا ھەلوەستا برێز سۆیلو و باخچەلی و ھەلوەستا ئاکەپێ دە ژ سەدی سەد ناکۆکی ھەنە. لێ د ڤان دەمێن داوی دە پارتیا داد و گەشەپێدانێ ھەلوەستێن ڤان کەسان تەحەممول کر، کو د دەمێن بۆری دە گۆتنێن ھەری توند ژ ئاک پارتیێ رە گۆتنە، دبە کو ژ بەر ئەرکێن دن بە. ئەڤ لێبۆردەیی د ھەر کێلیێ دە دبیت تێکبچیت.
گونای ب ڤی ئاوایی داخویانیا خوە بەردەوام دکە: وەک جەهەپە و گەلەک پارتیێن دن، د پارتیا داد و گەشەپێدانێ دە ژی گەلەک ناڤێن کو ئەز د گەلدا دجڤم هەنە. ب راستی، گەلەک ھەڤالێن مە یێن کو ژ دەما دەرکەتنا پارتیا داد و گەشەپێدانێ ڤە ل ور بوون، ژ بەر رەوشا ئاک پارتیێ یا ڤان سالێن داوی عاجزن. ژ بەر کو د سالێن بۆری دە یێن کو گۆتنێن ھەری گران و و خراب ئاک پارتی تاوانبار کرین، دژبەرێن ئاک پارتیێ یێن وەک باخچەلی و سۆیلو بوون. ب ئەشکەرەیی، ئیرۆ ژی خویایە کو وان ھەلوەستا خوە زێدە نەگوھەراندیە. د ڤێ سەردەمێ دە ژی، ھەلوەستا خوە ل ھمبەرێ دەمۆکراسی و مافێن مرۆڤان ددۆمینن.
تەڤی ڤێ یەکێ یەک ژێ ھەڤپارێن بچووک یێن ئاک پارتیێ یە و یێ دن ژی ئەندامێ کابینەیا سەرۆککۆماریێ یە. ھەلبەت نە موومکنە کو ئەو ئەندامێن کو ژ بۆ ئاک پارتیێ خەبات کرنە و ھێ ژی سۆزێن ئاک پارتیێ د دلێ خوە دە دھێلن، ب فکار لێ نەنێرن و نە نەرەحەت بن. نەرەحەتیەکە وھا نھا د ناڤ ئاک پارتیێ دە ھەیە.
د ناڤەندا ئاک پارتیێ دە گەلەک کەس ژ ھەلوەستا ڤان عاجزن، لێ دەنگەک بلند بەحسا نەرحەتیا خوە ناکن. ئەز باش دزانم کو، گەلەک کادرۆیێن ئاک پارتیێ ژ ھەلوەستا مەھەپێ و یا سۆیلو عاجزن.
