بالیۆزخانەیا کانادا یا ل ئیراقێ تەڤی شەرمەزارکرنا ئێریشێن سوپایێ پاسدارێن ئیرانێ یێن ل سەر ھەرێما کوردستانێ، تەکەز کریە کو “دڤێت ئیران ئێریشێن خوە راوەستینە”.
ئیرۆ دوشەمێ 21ێ مژدارا 2022یێ، بالیۆزخانەیا کانادایا ل ئیراقێ د داخویانیەکێ دا راگھاند: “ئەم ئێریشێن ئیرانێ یێن ل سەر ھەرێما کوردستانێ و کامپا پەنابەران شەرمەزار دکن.”
د داخویانیا بالیۆزخانەیێ دا ھات دەستنیشانکرن: “ئێریشێن ب ڤێ جوورەیێ، سەروەریا ئیراقێ بنپێ دکن و ژیانا خەلکێ سڤیل دخن مەترسیێ. دڤێ ئیران ڤان ئێریشان راوەستینە.”
ئیرۆ دوشەمێ 21ێ مژدارا 2022یێ، ئیرانێ ب رێیا درۆن و مووشەکان چەند کامپێن نشتەجیبوون و بارەگەھێن پارتیێن رۆژھلاتێ کوردستانێ یێن ل ھەرێما کوردستانێ کرن ئارمانج. ل گۆر ئامارێن ھەری داوی، د ئەنجاما ئێریشا ئیرانێ دا پێشمەرگەیەکی پارتیا دەمۆکراتا کوردستانا ئیرانێ یێ ب ناڤێ بەھزاد شەھید بوو.
سوپایێ پاسدارێن ئیرانێ بەرپرسیاریا وان ئێریشان گرتە سەر خوە و ئەڤ ئێریش ل ناڤخوە و ناڤدەولەتی راستی کارڤەدانان ھات، ئامەریکا و وەلاتێن ئەورۆپی داخوازا راوەستاندنا ئێریشان کرن و راگهاندن ئەڤ ئێریش سەروەریا ئاخا ئیراقێ بنپێ دکن.
