وەزارەتا به‌رگریێ یا ئه‌مه‌ریكایێ (پێنتاگۆن) ب توندی ئۆپەراسیۆنێن ئاسمانی یێن ترکیێ ل رۆژئاڤایێ کوردستانێ شەرمەزار کرن و تەکەز کر کو ئێرشێن ئاسمانی یێن ڤێ داویێ یێن ئەنقەرێ، ئەولەهیا لەشکەرێن ئه‌مه‌ریكایێ خستیە خه‌ته‌ریێ.
پێنتاگۆنێ شەڤا بۆری راگهاند، ئێریشێن ئاسمانی یێن ڤێ داویێ یێن ترکیێ ل باکورێ سووریێ ئەولەکارییا لەشکەرێن ئه‌مه‌ریكی دخە خه‌ته‌ریێ و تێکۆشینا بەرفرەها ب سالان ل دژی چەکدارێن داعشێ ژی دخە مەترسیێ.
ئەڤ داخویانی، شەرمەزارکرنا هەری توندا ئه‌مه‌ریكایێ ل هەمبەر ئۆپەراسیۆنێن ئاسمانی یێن ترکیێ ل دژی رۆژئاڤایێ کوردستانێ و باکورێ سووریێ، نیشان ددە.
بەردەڤکێ پێنتاگۆنێ گەنەرال پات ریدەر د داخویانیەکێ دە گۆت: «ئێریشێن ئاسمانی یێن ڤێ داویێ ل سووریێ، راستەراست ئەولەکارییا لەشکەرێن ئه‌مه‌ریكی یێن کو ل سووریێ ب هەڤکارێن خوەجهی رە ژ بۆ تێکبرنا داعشێ دخەبتن، دخە مەترسیێ».
هەر وها ریدەر گۆت ژی: «ئه‌مه‌ریكا نیگەرانیێن ئەولەهیێ یێن رەوا یێن ترکیێ تێدگهە».
ریدەر گۆت ژی: «ئارامیەکە دملدەست پێویستە ژ بۆ دۆماندنا ئەرکێ تێکبرنا داعشێ و دابینکرنا ئەولەکاری و سەلامەتیا لەشکەران ل سەر ئەردێ».
نێزیکی 900 لەشکەرێن ئه‌مه‌ریكا ل سووریێ هەنە، ب تایبەتی رۆژئاڤایێ کوردستانێ ل باکورێ رۆژهلاتێ سووریێ و ب هێزێن سووریا دەمۆکراتیک (هه‌سه‌دێ) رە کار ژ بۆ شەرێ ل دژی پاشماهیێن داعشێ دکن.
ترکیێ ژ رۆژا یەکشەمێ 20ێ مژدارا 2022ان ڤە، دەست ب ئۆپەراسیۆنەکە ئاسمانی ل دژی رۆژئاڤا و باشوورێ کوردستانێ کریە و دوهی ژی 3 کێلگەهێن پەترۆلێ، دەردۆرا زیندانا چرکین یا کو ئەندامێن داعش لێ گرتینە، ئۆفیسا پێوەندیان یا هه‌سه‌دێ یا ل ناڤا بارەگەها رووسی ل گوندێ مەباقرێ سەر ب تل تەمرێ ڤە و کامپا هۆلێ بۆمبەباران کرن و د ئەنجامێ دە هەژمارەک ژ وەلاتیێن سڤیل و شەرڤانێن هه‌سه‌دێ هاتنە کوشتن.
وەک کارڤەدانەکێ ل هەمبەر ڤان ئێریشان و بێدەنگیا هەڤپەیمانیا ناڤدەولەتی دە، فەرماندارێ گشتییێ هێزێن سووریا دەمۆکراتیک (هه‌سه‌دێ) مەزلووم عەبدی راگهاند کو وان ئۆپەراسیۆنێن خوە یێن لگەل هەڤپەیمانیا ناڤدەولەتی راوەستاندنە.
