ئەنجوومەنا نشتمانی یا کوردی ل سووریێ (ئەنەکەسە) دەربارێ ئێریشێن ترکیێ ل سەر رۆژئاڤا و باشوورێ کوردستانێ دا رادگھینە، نابە رۆژئاڤا و ھەرێما کوردستانێ ببن مەیدانا شەرێ د ناڤبەرا ترکیا و پەکەکێ دە.
سەکرەتەریا گشتی یا ئەنەکەسێ ئیرۆ 24ێ مژدارا 2022یێ د داخویانیەکێ دا راگھاند، “ترکیا ژ بەربانگا 20ێ مژدارێ ڤە، دەست ب ئێرشێن ئاسمانی ل سەر گەلەک خالێن ناڤچەیێن سینۆری یێن د ناڤ ئاخا سووریێ دا و ل سەر دەڤەرێن کوردی ژ دێرکێ ل رۆژھلات و ھەتا گوندەوارێ باکورێ حەلەبێ ل رۆژئاڤا کریە و ناڤەندێن بنەسازی، خزمەتگوزاری و ئەلەکتریکێ کرن ئارمانج، د ئەنجاما ڤان ئێریشان دا ژی گەلەک سڤیل ھاتن کوشتن و بریندارکرن.”
ئەنەکەسە ئاماژە ب وێ کر ژی: “بۆمبەبارانا ترکیێ گھیشتە بارەگەھێن پەکەکێ یێن د ناڤا ھەرێما کوردستانێ دا کو د ھەمان دەمێ دە ژی سوپایا پاسدارێن ئیرانێ ب مووشەک و درۆنێن بۆمبەکری ئێریشی خاکا ھەرێما کوردستانێ، کامپێن کۆچبەرێن کوردێن کوردستانا ئیرانێ و بارەگەھێن پارتیێن وێ کرن.”
ئەنەکەسێ دیار کر ژی، ئیران ب ڤان ئێریشێن ژ دەستپێکا سەرھلدانا گەلێن ئیرانێ یا ل دژی رەژیما زۆردارا تەھرانێ، ھەول ددە ب ئێریشا ل سەر ھەرێما کوردستانێ، کریزا خوەیا ناڤخوەیی دەرخینە دەرڤە.
ھەر وھا ئەنەکەسێ دبێژە: “ئەڤ ئۆپەراسیۆن، ژ بلی بنپێکرنا سەروەریا سووریا و ئیراقێ ژ ئالیێ وەلاتێن جیرانێن ترکیا و ئیرانێ ڤە، ئەو گەفەکە جدییە ل ئارامیا ناڤچەیێ و ئەولەکاری و سەلامەتیا وەلاتیانە رەوشەکا ترس و خۆفێ ل ناڤچەیێن کوردی ل سووریێ چێدکە.”
د داخویانیەکێ دا ھات گۆتن: “ئەنەکەسە تەڤی شەرمەزارکرنا ڤان ئێریشان کو دبن سەدەما کارەساتان، ئەو داخوازا راوەستاندنا وان دکە و تەکەز دکە کو ئۆپەراسیۆنێن ب ڤی رەنگی، رەوشێ ئالۆزتر و خرابتر دکن و یەکانە رێ ژ بۆ چارەسەرکرنا پرسگرێکان، زمانێ دیالۆگێ و دیپلۆماسیێ یە.”
ھەر وھا د داخویانیێ دا ھات: “ئەنەکەسە تەڤی کو رەد دکە ھەرێما کوردستانێ و کوردستانا سووریێ ببە مەیدانا ئۆپەراسیۆنان و چارەسەرکرنا حەسابان د ناڤبەرا پەکەکێ و ترکیێ دا، د ھەمان دەمێ دا داخواز ژ جڤاکا ناڤدەولەتی و حکوومەتا ئیراقێ دکە کو ب بەرپرسیاریا خوە رابن و رێ نەدن رێژیم و پاسدارێن ئیرانێ کو ئێریشی سەر ھەرێما کوردستانێ بکن.”
ھەر وھا ئەنەکەسە بانگ ل ئامەریکا، رووسیا و ھێزێن ھەڤپەیمانان دکە کو دەستوەردانێ بکن ژ بۆ راوەستاندنا ئۆپەراسیۆن و ئێریشێن ئاسمانی یێن ترکیێ ل سەر ئاخا سووریێ و ئالۆزیا ل سەر ھەر دو ئالیێن سینۆر راوەستینن.
د داویێ دا ئەنەکەسێ بانگ ل گەلێ کورد و ھەموو خەلکێ ھەرێمێ کر کو ب جھ و وارێ خوە بمینن، ئاشتیا سڤیل بپارێزن و ھەڤکاری و نرخێن پێکڤەژیانێ د ناڤبەرا خوە دا بلند بکن.
