ناڤەندا مافێن مرۆڤان یا ئیرانێ (ھرانا) راگھاند، د خوەپێشاندانێن ئیرانێ دە ھەری کێم 448 خوەپێشاندەر ھاتنە کوشتن و نێزیکی 18 ھەزار کەس ژی ھاتنە دەستەسەرکرن.
ل گۆر ناڤەندا مافێن مرۆڤان یا ھرانا، ژ 16ێ ئیلۆنێ ھەتا 25ێ مژدارێ، خوەپێشاندان ل 156 باژار و باژارۆکێن ئیران و رۆژھلاتێ کوردستانێ برێڤە چوونە و ژ بەر کارڤەدانا توند و تەقەیێن راستەراستێن ھێزێن ئەولەھیا ئیرانێ ڤە، 448 خوەپێشاندەر ھاتنە کوشتن، کو ژ وان 63 کەس زارۆکن. ھەروھا 18 ھەزار و 170 خوەپێشاندەر ژی ھاتنە دەستەسەکرن.
ھرانا ئەشکەرە کریە، د ناڤا ڤێ دەمێ دە ل 143 زانینگەھان کۆمبوون و خوەپێشاندان ھاتنە کرن و 565 خوەندەکار ژی ھاتنە دەستەسەرکرن.
ناسنامەیێن سێ ھەزار و 234 خوەپێشاندەرێن دەستەسەرکری ژ چالاکڤانێن ژ بۆ ناڤەندا مافێن مرۆڤان یا ئیرانێ (ھرانا) ئەشکەرە بوونە، د ناڤ وان کەسان دە 110 زارۆکێن ل ژێر 18 سالی ھەنە، کو ژ وان 74 کور و 36 کەچن.
ئەنجوومەنا مافێن مرۆڤان یا نەتەوەیێن یەکگرتی رۆژا 24ێ مژدارێ، ل سەر مژارا بنپێکرنا مافێن مرۆڤان ل ئیرانێ جڤیا. د جڤینێ دە بریار ھات دایین کو لژنەیەکا لێکۆلینێ یا ناڤدەولەتی ژ بۆ لێکۆلینا تەپەسەرکرنا خوەپێشاندانێن ئیرانێ، بهێت پێکانین.
