وەزارەتا دەرڤەیا ئامەریکایێ راگھاند، رووسیا ب ئاوایەکی یەکئالی دانووستاندنێن دەربارێ کێمکرنا چەکێ ئەتۆمی دە پاش خست، کو بریار بوو سبە سێشەمبێ ل قاھیرەیێ برێڤە بچە.
ئیرۆ دوشەمبێ 28ێ مژدارا 2022یێ، بەردەڤکەکێ ژ وەزارەتا دەرڤەیا ئامەریکایێ ئەشکەرە کر، رووسیایێ ژ وان رە راگھاندیە کو جڤینێن ل سەر “پەیمانا نیو ستارت” کو بریار بوو ڤێ ھەفتەیێ ل قاھیرەیێ د ناڤبەرا ھەردو ئالیان دا بهێت ئەنجامدان، ھاتیە پاشخستن، ھەروھا دیار کر کو واشنگتۆن چاڤەرێ دکە، مۆسکۆو دەمەک نوو ژ بۆ دەستپێکرینا جڤینان دیار بکە.
بریار بوو د ناڤبەرا 29ێ مژدارێ و 6ێ کانوونا 2022یێ دە رایەدارێن پایەبلندێن ھەردو وەلاتان ل پایتەختا مسرێ بجڤن و ل سەر دەستپێکرنا پشکنینان ل گۆر پەیمانا نیو ستارت یا ل سەر کێمکرنا چەکێ ئەتۆمی گۆتووبێژێ بکن، کو ژ بەر بەلاڤبوونا ڤیروسا کۆرۆنایێ ژ مەھا ئادارا 2022یێ ڤە ھاتبوو راوەستاندن.
پێوەندیێن ناڤبەرا واشنگتۆن و مۆسکۆیێ ژ دەما دەستپێکرنا شەرێ ئوکراینایێ یا مەھا سباتێ ڤە، گھیشتیە ئاستا ھەری بلندا ئالۆزیێ، ئەڤ ژی ژ بەر پشتەڤانیکرنا سەربازی یا ئوکراینایێ ژ ئالیێ ئامەریکایێ ڤە، ھەروھا گەفێن سەرۆکێ رووسیایێ ڤلادمیر پوتنێن ل سەر بکارئانینا چەکێ ئەتۆمی، مەترسیێن ل سەر سەقامگیریا جیھانێ زێدەتر کریە.
