ژ بەر گەفێن ترکیێ یێن دەستپێکرنا ئۆپەراسیۆنەکا لەشکەری یا بەژایی ل رۆژئاڤایێ کوردستانێ و باکورێ سووریێ، ھێزێن ئامەریکی گەرێن خوەیێن ھەڤبەشێن لگەل ھەسەدێ دا یێن ل دژی داعشێ، راوەستاندن.
فەرمانداریا ناڤەندی یا ئارتێشا ئامەریکا دوھی ئەینیێ راگھاند، ژ بەر گەفێن ترکیێ یێن دەستپێکرنا ئۆپەراسیۆنەکا لەشکەری یا بەژایی ل باکورێ سووریێ، ھێزێن ئامەریکی گەرێن خوەیێن ھەڤبەشێن لگەل ھەسەدێ دا یێن ل دژی داعشێ، راوەستاندن.
ئەڤ یەک د دەمەکێ دایە، بریارە ئیرۆ گەرێن دن یێن ئەولەھیێ، ب تایبەت ل دەردۆرا گرتیگەھێن داعشێ دەست پێ بکن.
بەردەڤکێ فەرمانداریا ناڤەندی یا ئارتێشا ئامەریکا کۆلۆنەل جۆ بوجنۆ دیار کر، “ھێزێن سووریەیا دەمۆکراتیک ژ بۆ پاراستنا ئەولەھیا کامپا ھۆلێ و ناڤەندێن بنچاڤکرن و زندانان، د گەرێن خوە دە بەردەوامە.
تەکەز ژی کر، داعش ل سەر ئەولەھی و ئارامیا ھەرێمێ، گەفەکا بەردەوامە.
ھەسەدێ ژی گۆت کو وان ھەموو ئۆپەراسیۆنێن خوەیێن ھەڤبەش یێن ل دژی تەرۆرێ لگەل ئامەریکا و ھەڤپەیمانێن دن راوەستاندن، ئەو ژی د ئەنجاما ئێریشێن ترکیێ ل سەر ناڤچەیێن د بن کۆنترۆلا وێ دە.
بەردەڤکێ ھەسەدێ ئارام ھاننا ژ بۆ “رویتەرس” ئاخڤی و گۆت: “مە ھەموو ھەماھەنگی و ئۆپەراسیۆنێن ھەڤبەشێن دژە-تەرۆرێ لگەل ھەڤپەیمانیا ناڤدەولەتی دا و ھەر وھا “ھەموو ئۆپەراسیۆنێن تایبەتێن ھەڤبەش کو مە ب رێکووپێک پێک دئانین، راوەستاندن.”
ژ ئالیێ خوە ڤە، بەردەڤکێ ئەنجوومەنا ئاسایشا نشتمانی جۆن کربی دوھی ئەینیێ ژ بۆ رۆژنامەڤانان راگھاند، وەکە بەرێ، دەما ئۆپەراسیۆنێن ترکیێ ل باکورێ سووریێ تێن کرن، ئەو باندۆرێ ل ئۆپەراسیۆنێن دژی داعشێ دکن.
ترکیا ژ 20ێ مژدارا 2022یێ ل ڤە ناڤچەیێن جوداێن رۆژئاڤایێ کوردستانێ و ناڤەچەیێن د بن کۆنترۆلا ھەسەدێ دا ئۆپەراسیۆنێن ئاسمانی پێک تینە، ئامەریکا ژی ژ ڤێ یەکێ نە رازییە.
وەزیرێ بەرەڤانیێ یێ ئامەریکایێ لۆید ئاوستن ژی رۆژا چارشەمبا بۆری گۆتبوو ھەڤتایێ خوەیێ ترکیێ خولوسی ئاکار: “ئامەریکا ب توندی ل دژی ھەر ئۆپەراسیۆنەکا لەشکەری یا نوو یا ترکیێ ل سووریێ یە.”
