ل سەر تێکلیێن نهێنی یێن د نێڤبەرا پەکەکێ و میتا ترک دە گەلەک تشت تێن باس کرن، لێ هەرتم پەکەکە ڤان تشتا ئینکار دکە و کەسێن ڤان تشتا باس دکن ب سیخۆری و خیانەتێ تێن تاوانبارکرن.
ت جاران پەکەکە رێ نادە ب ئاوایەک ڤەکری باس ل تێکلیێن میتێ ب پەکەکێ رە بێن کرن، پەکەکە هەر تشتی ئینکار دکە، لێ بەلێ دەما مرۆڤ ل دیرۆکێ و پێشهاتان دنێرە هەر تشت ئەشکەرە دبە، پەکەکێ ب ئاوایەکی سیستەماتیک ل سەر مه‌ژیێ کوردێن باکور ب گشتی و ئالیگرێن خوە ب تایبەتی کار کری یە، ب دەزەنفەرماسیۆن و نووچەیێن بێ بنگەهـ مه‌ژیێ وان شۆشتییە، ب ئاوایەکی کو پرانییا وان نها ب تەنێ وێ تشتێ دبینن و باوەر دکن یێن پەکەکە ژ وان رە بەرچاڤ دکە و باس دکە.
پەکەکێ ئالیگرێن خوە ب ئاوایەکی خاپاندنە کو باوەر ب وان ڤیدیۆیان ژی ناکن یێن ل سەر ئۆجالان د گرتیگەهێن ترکیێ دە ب نهێنی هاتنە کشاندن، ئەو ب ئاوایەکی هاتنە خاپاندن کو دبێژن ئەڤ ڤیدیۆ مۆنتاژن، ئۆجالان ب ڤی ئاوایی ناپەیڤە، میتێ ئەڤ ڤیدیۆ سەختە و مۆنتاژ کرنە.
نها د رۆژەڤا ترکیێ دە باس ل ڤێ یەکێ تێ کرن کو سەرۆکێ میتێ هاکان فیدان داخواز ژ سەلاحەدین دەمیرتاش کری یە جیێ عەڤدللا ئۆجالان بگرە، ئەڤ گۆتن دەمیرتاش ب خوە گۆتییە، تەڤی کو پێش نها گەلک تشت دهاتن گۆتن و پەکەکێ ئینکار دکر، لێ ئەڤ جار رەوش جودایە ژ بەر کو ژ ئالیێ یەک ژ کادرۆیێن پەکەکێ ب خوە ڤە هاتییە گۆتن، تشتا بالکێش ژی ئەڤە گەلۆ میت چما دخوازە سەلاحەددین جیێ عەڤدللا بگرە؟
مرۆڤ د خوەزایا خوە دە ووسایە کو ناخوازە دژمنێ وی هەبە، گەر هەبە ژی دخوازە هەر د زوو دە وی دژمنی ژ ناڤ ببە، گەر ئەڤ دژمناتی د ئالیەکی گشتی و نەتەوایەتی دە بە ژی ژ خوە رەوش پڕ جودایە، هەر چ قاس مرۆڤ دژمنێ خوە زوو بشکینە، ژناڤ ببە و ل سەر ئەردێ نەهێلە، وێ زووتر بگهیژە ئارمانجا خوە، گەر بەرەڤاژی ڤێ یەکێ روو بدە وێ دەمێ هەر کەس وێ بزانبە ت دژمناتیەک ل هۆلێ تونە، یا هەیی هەڤاهەنگی یە و نە تو تشتەکی دن.
د دادگەھا جەزایێن گران یا ئەنقەرێ دە دۆزا کۆبانێ بەردەوام دکە، ھەڤسەرۆکێ بەرێ یێ هەدەپێ سەلاحەددین دەمیرتاش ژی د ڤێ دۆزە دە تێ دارزاندن، روونشتنا دادگەھێ دیسا رۆژا 1ێ کانوونا 2022یێ دەستپێکر و دو رۆژان بەردەوام بوو.
ھنەک بەلگەیێن ڤێ دۆزێ کو پڕ بالکێش بوون ژ ئالیێ ھەدەپێ ڤە ھاتنە بەلاڤ کرن، ھەدەپێ راگهاند: دەمیرتاش د روونشتنێ دە ئاماژە ب وێ یەکێ دایە د دەما پێڤاژۆیا ئاشتیێ دە دەما شاندە دچوون ئیمرالیێ، سەرۆکێ میتێ ھاکان فیدان خوەستی یە ل گەل وی ھەڤدیتنێ بکە لێ وی قەبوول نەکری یە، دەمیرتاش دبێژە ب زانەبوون دخوازن د ناڤبەرا وی و رێبەرێ پەکەکێ عەبدوللا ئۆجالان دە رۆژەڤەکە ڤالا ئاڤا بکن و ئەو د ڤێ زانەبوونێ دە نە.
دەمرتاش دبێژە: «بلا کەس ژ مە ھێڤی نەکە کو ئەم گاڤێ پاشدە باڤێژن و خوە رادەستی وان بکن، پێشنیار کرن کو من بێخن جھێ ئۆجالان، خوەستن ژ من ئۆجالانەکی بچووک چێبکن، ئەم ئەمن و ئۆجالان ژی ئۆجالانە، ھێز و رۆلا ئۆجالان ھەیە، باندۆرێ ل سیاسەتا رۆژھلاتا ناڤین بکە، ئەم ژی وەک نوونەرێن سیاسی یێن گەل بۆ چارەسەریێ ل پارلامەنتۆیێ خوەدیێ رۆلەکی نە».
ب ڤان گۆتنێن دەمیرتاش ووسا دخویە ئۆجالان ئێدی مری یە، یان ژی بەر ب مرنێ دچە و دەولەتا کوور یا ترکیێ ژی دخوازە کەسەک دن ل جیێ وی دەینە و ب رێیا وی رێیا خوە یا خاپاندنا کوردان ب دەستێ کوردان و ب سەرۆکەک ساختە د بەرژەوەندییا ترکیێ دە بدۆمینە، گەر ووسا نەبە چما میت دخوازە کەسەک دن ل جیێ ئۆجالان بێ دانین؟ گەلۆ چما دەولەت دخوازە ئۆجالانەکی دن «ئۆجالانێ بچووک» ب ئافرینە؟ ما قەی وەکە پەکەکە دبێژە ئۆجالان نە دژمنێ ترکیێ یە؟ ل کیژان جی و واری وە دیتی یە کەسەک بخوازە دوژمنەکی ژ بۆی خوە ب ئافرینە و خوەدی بکە؟ نا ژ کەسێن ب ڤی ئاوایی رە نایێ گۆتن دژمن، ژ وان رە تێ گۆتن کرێگرتی، زلامێ دەولەتێ و خایینێ نەتەوا خوە.
