پشتی پەنتاگۆن و کۆچکا سپی، ئەنجوومەنا نوونەران یا ئه‌مه‌ریكایێ ژی بانگ ل ترکیێ کر کو ئێریشی رۆژئاڤایێ کوردستانێ و باکورێ سووریێ نەکە.
ئەنجوومەنا نوونەران یا ئه‌مه‌ریكایێ رۆژا شەمیێ گۆت، ئەو پر نیگەرانن کو ئێریشێن ڤێ داویێ یێن ترکیێ ل سەر باکورێ سووریێ، هەولێن شەرێ ل دژی رێخستنا تەرۆریست یا داعشێ تێک ببە.
سەرۆکێ کۆمیتەیا کاروبارێن دەرڤە یا ئەنجوومەنا نوونەران گریگۆری میکس د داخویانیەکێ دا گۆت: «پشتی تەقینا کو د دەستپێکا ڤێ مەهێ دە ل ستەنبۆلێ روو دایە و د ئەنجامێ دە سڤیل هاتن کوشتن و بریندارکرن، نیگەرانیێن ئەولەکارییا نەتەوەیی یا ترکیێ یێن رەوا هەنە».
گۆت ژی: «لێ بەلێ، ل گەل وێ ژی ئەم گەلەکی نیگەرانن کو ئێریشێن ڤێ داویێ یێن ترکیێ ل سەر هه‌سه‌دێ، هەولدانێن ل دژی داعشێ دخە مەترسیێ. د دەما کو داعش ئێریشێن خوە یێن تەرۆریستی ددۆمینە و هەول ددە دوبارە خوە برێکخستن بکە».
داخویانیێ داخواز ژ سەرۆکۆمارێ ترکیێ رەجەپ تاییپ ئەردۆگان کر کو خوە ژ هەر جورە کارەکی کو شیانا هەڤپەیمانیا ناڤدەولەتی یا شەرێ ل دژی داعشێ تێک ببە، دوور بخە.
ترکیە ژ 20ێ مژدارا 2022ان ڤە ب رێیا فرۆکەیێن شەر، درۆن و تۆپخانەیێ دەست ب ئۆپەراسیۆنەکێ ل سەر ناڤچەیێن جودا یێن رۆژئاڤایێ کوردستانێ و ناڤەچەیێن د بن کۆنترۆلا هه‌سه‌دێ دە کریە، لێ ئه‌مه‌ریكا ژی ژ ڤێ یەکێ نە رازییە.
ئەڤ د دەمەکێ دە یە، سەرۆکۆمارێ ترکیێ رەجەپ تاییپ ئەردۆگان دوهی ل رهایێ گۆت: «ل سەرانسەرێ سینۆرێ باشوور ئەمێ کۆریدۆرا ئەولەهیێ تەمام بکن».
