ھەڤکاریا کوردستانی یا ژ پارتیا ئازادیا کوردستان (PAK)، پارتیا سۆسیالیست ئا کوردستان (PSK) و تەڤگەرا دەمۆکراتێن کوردستانێ (TDK) پێک تێ دەربارێ تفاقێن ھلبژارتنێ دە دبێژە تفاقا وان نە ژ بۆ کورسیێن پارلەمەنتۆیێ یە، تفاقا وان بۆ ناسینا مافێن رەوا یێن کوردانە.
بەر ب ھلبژارتنا پارلەمەنتۆیێ و سەرۆککۆماریێ ڤە تفاقێن ھلبژارتنێ ژی زێدە دبن کو ھەدەپە ژی تفاقا کەد و ئازادیێ راگھاندبوو و دخوازە تفاقا ل گەل پارتیێن کوردستانی ژی بپارێزە لێ گەلەک پارتی و رێخستنێن کوردستانی دەرڤەیی وێ تفاقێ نە. پارتی و رێخستنێن کوردستانی یێن دەرڤەیی تفاقا ھەدەپێ دبێژن ئەو ژ بۆ کورسیان تفاقێ ناکن و تفاقا وان، تەنێ بۆ ب بدەستخستنا مافێن رەوا یێن کوردانە و بۆ ڤێ یەکێ ژی دڤێ دەستوور بهێت گوھەرین و ب ھێزا کو بکارە ڤێ یەکێ بکە رە ژی دکارن رونن و گۆتوبێژێ بکن.
بەردەڤکێ تەڤگەرا دەمۆکراتێن کوردستانێ جانۆ ئامەدی ژ K24ێ رە گۆت: “دڤێت د دەستووری دە ماددەیا یەکێ دە بێژە ئەڤ دەولەت ژ کورد و ترکان پێک تێ، مافێ کوردان قاسی مافێ ترکان رەوا یە، زمانێ کوردان وەک فەرمی بێ قەبولکرن. سەر ڤان خالان ئەم دکارن تفاقێ بکن، لێ دەرڤەیی ڤان ئەم لگەلچ ئالیەکێ تفاقێ سەر بازارا کورسی و شارەداریان ناکن.”
پارتیا ئازادیا کوردستان، پارتیا سۆسیالیستا کوردستان و تەڤگەرا دەمۆکراتێن کوردستانێ ب ناڤێ ھەڤکاریا کوردستانی نھا تفاقا د سباتێ دە ھاتبوو ئاڤاکرن ددۆمینن و ددن زانین کو تفاقا وان نە ژ بۆ ھلبژارتنێ یە لێ ئەڤ نایێ وێ واتەیێ کو ئەو گرنگیێ نادن ھلبژارتنان و د ھلبژارتنێ دە ژی دێ خوەدی ھەلوەست بن.
سەرۆکێ گشتی یێ پارتیا سۆسیالیستا کوردستان بایرام بۆزیەل دبێژە: “ھەڤکاریا مە بەردەوامە و ئەم دخوازن بەرفرەھتر ژی ببە. پێشیا مە پۆتانسیەلا گوھەرینا ترکیەیێ ھەیە. دەستورەک نوو تێ نیقاشکرن، سیستەما سەرۆکاتیێ تێ نیقاشکرن، مەسەلیا کورد ب ھەمو گرانیا خوە د رۆژەڤێ دە یە، لازمە کورد ژی ببن ئالیەک ڤێ پێڤاژۆیێ. دا کو بکاربن ھلبژارتنا سەرۆکاتیێ دە ل گۆری ڤێ یەکێ ھەلوەستەک دەینن.”
ھەڤکاریا کوردستانی دبێژە دڤێ د دەستووری دە ناسنامەیا کورد بهێت ناسین و زمانێ کوردی ژی وەک زمانێ فەرمی بهێت قەبولکرن و کیژان تفاق ب گەرمی نێزیکی ڤان خالان ببە ئەو دکارن ل گەل وان نرخاندنێ بکن.
