ئارتێشا ئه‌مه‌ریكایێ ئامادەکاریان دکە بۆ زێدەکرنا گەرێن هەڤبەشێن ل گەل هێزێن سووریەیا دەمۆکراتیک (هه‌سه‌دێ) ل ناڤچەیێن رۆژئاڤایێ کوردستانێ و باکورێ سووریێ، ئەڤ ژی د دەمەکێ دەیە کو ترکیە گەفا ئێریشەکە بەژایی بۆ سەر ناڤچەیێ دخوە.
رۆژا چارشەمبێ 7ێ کانوونا 2022ان، مەدیایا ئه‌مه‌ریكایێ راگهاندیە کو سێ بەرپرسێن بلندێن ئه‌مه‌ریكایێ کو نەخوەستنە ناڤێن خوە ئەشکەرە بکن، گۆتنە ئەگەر هەیە ترکیە گەفێن خوە بخە پراتیکێ، هێزێ بشینە باکورێ سووریێ و ئەڤ یەک ژی مەترسیێ بۆ سەر سەربازێن ئه‌مه‌ریكایێ یێن ل وێ ناڤچەیێ چێدکە.
بەردەڤکێ فەرمانداریا ناڤەندی یا ئارتێشا ئه‌مه‌ریكایێ کۆلۆنێل جۆ بوچینۆ، دەربارێ ئەگەرا ئۆپەراسیۆنا ترکیێ ل سووریێ دبێژە: «ئەم ژ هەر کریارەکێ نیگەرانن کو دبە وان دەستکەفتان بخن مەترسیێ کو د وارێ ئاساییش و ئارامیا سووریێ دە هاتنە بدەستخستن».
بەردەڤکێ فەرمانداریا ناڤەندی یا ئارتێشا ئه‌مه‌ریكایێ هەروها دبێژە: «ئەم ژ ئەمنیەتا هه‌سه‌دێ نیگەرانن، کو هەڤبەشێ مەیێ ناسکری و جهێ باوەریێ یە ل وی جهێ مە پرانیا سەربازێن خوە ژێ ڤەکشاندنە».
هەفتەیا بهۆری، پشتی ترکیێ ئێریشی رۆژئاڤایێ کوردستانێ و باکورێ سووریێ کر و هەژمارەک خەلکێ سڤیل و سەربازی بوون قوربانی، فەرماندارێن سەربازی یێن ئه‌مه‌ریكایێ گەرێن هەڤبەشێن ل گەل هه‌سه‌دێ کێم کربوون. لێ پشتی ئارامبوونا رەوشێ، بەرپرسێن ئه‌مه‌ریكایێ ئاماژە ب وێ یەکێ دانە کو سەربازێن ئه‌مه‌ریكی و شەرڤانێن هه‌سه‌دێ چەند گەرێن هەڤبەش پێک ئانینە.
نێزیکی 900 سەربازێن ئه‌مه‌ریكی ل سووریێ هاتنە بجیهـ کرن و پرانیا وان ل گەل شەرڤانێن هه‌سه‌دێ بنگەهێن وان یێن هەڤبەش هەنە.
