رێخستنا هیومان رایتس ووچ دیار دکە، ئێریشێن ترکیێ ل سەر رۆژئاڤایێ کوردستانێ و باکورێ سووریێ، ئالۆزییا مرۆڤی یا ل هەرێمێ هەیە، زێدەتر کری یە.
رێخستنا هیومان رایتس ووچ د راپۆرتەکێ دە بەلاڤ کر، ئێریشێن ئاسمانی یێن ترکیێ کو د 20ێ مژدارا 2022ێ دە دەست پێ کر بوون، زیان گهاندنە دەڤەرێن نشتەجیهبوونێ و بنەسازییا کریتیک یا باکور و باکورێ رۆژهلاتێ سووریێ و ئالۆزییا مرۆڤی یا هەیی یا باندۆرێ ل سەر کورد، عەرەب و پێکهاتەیێن دن یێن ل هەرێمێ دکە، زێدەتر کری یە.
هیومان رایتس ووچ دبێژە، ئێریش بوونە سەدەما کۆچبەربوونا مالباتان، قوتبوونا ئەلەکتریکێ، کێمبوونا سۆتەمەنیێ، گرتنا دبستانان و رێخستنێن ئالیکاریێ نەچار کرن کو ب ئاوایەکی دەمەکی هن چالاکییان بدن سەکناندن.
جیگرێ رێڤەبەرا رۆژهلاتا ناڤین د هیومان رایتس ووچێ دە ئاده‌م كۆگڵ گۆت: «ئێریشێن ترکیێ ل سەر دەڤەرێن نشتەجیهبوونێ و ژێرخانەیا کریتیک ل باکور و باکور- رۆژهلاتێ سووریێ بێتر مافێن بنگەهین یێن سڤیلان دخە مەترسیێ کو ژ خوە کورد، عەرەب و پێکهاتەیێن دن یێن هەرێمێ د کریز و ئابۆرییەکە تێکچوویی دە دمینن».
كۆگڵ گۆت: «ترکیە دکارە بکە کو کریارێن وێ یێن لەشکەری کریزێن مرۆڤی و کۆچبەریێ ل باکورێ رۆژهلاتێ سووریێ گرانتر نەکە».
هه‌روه‌ها گۆت: «پێویستە هەڤالبەندێن ترکیێ یێن ناڤدەولەتی زەختێ ل حکوومەتا وێ بکن، دا کو پشتراست بکە کو ئۆپەراسیۆنێن وێ مافێن بنگەهین یێن گەلێ سووریێ بنپێ نەکە».
