سیناتۆرەکی ئه‌مەریکی هشیاری ددە، ئەگەر ترکیە ئۆپەراسیۆنەکە بەژاهی ل دژی رۆژئاڤایێ کوردستانێ بکە، دێ نەرازیبوونا ئه‌مەریکایێ ژ یا سالا 2019ێ توندتر بە.
ئەندامێ کۆمیسیۆنا پێوەندیێن دەرڤە یا سەناتۆیا ئه‌مەریکایێ یێ کۆماری جه‌یمس رێش، د دەرهەقێ ئەگەرا ئۆپەراسیۆنەکە ترکیێ ل دژی رۆژئاڤایێ کوردستانێ و باکورێ سووریێ دە ژ مەدیایا یونانیستانێ رە ئاخڤی و گۆت، ئۆپەراسیۆنا ترکیێ دێ رەوشا سووریێ ئالۆزتر بکە و دێ ببە سەدەما لاوازبوونا شەرێ داعشێ.
هەروه‌ها ژ ئۆپەراسیۆنێ رەڤا هەزاران تەرۆریستێن داعشێ دکارە ببە رۆژەڤ. سیناتۆرێ ئامەریکی هشیاری ددە ئەنقەرەیێ و دبێژە، ئەگەر ترکیە ئۆپەراسیۆن بکە، دێ نەرازیبوونا ئامەریکایێ ژ یا سالا 2019ان توندتر بە و ئەگەر د وێ ئۆپەراسیۆنێ دە لەشکەرەکی ئه‌مەریکی بێ کوشتن، دێ زرارەکە مەزن بگهە پێوەندیێن ئەنقەرە و واشنتۆنێ.
ئەڤ یەک د دەمەکێ دە، بەردەڤکێ وەزارەتا بەرەڤانیێ یا ئه‌مەریکایێ پاتریك ریدەر د کۆنفەرانسەکە رۆژنامەڤانیێ دە راگهاند، ئۆپەراسیۆنێن وان یێن هەڤبەش ل گەل هێزێن سووریەیا دەمۆکراتیک (هه‌سه‌دێ) ژ 9ێ ڤێ مەهێ ڤە ژ نوو ڤە دەست پێ کرنە.
پاتریک ریدەر گۆت کو ئارمانجا خەباتا وان ب هەڤکارێن خوەجهی رە ل باکور – رۆژهلاتێ سووریێ ئەوە، رێ ل ڤەژینا داعشێ بگرن.
پشتی گەف و ئێریشێن ترکیێ یێن ل سەر رۆژئاڤایێ کوردستانێ و باکورێ رۆژهلاتێ سووریێ، ئه‌مەریکا گەرێن خوە یێن هەڤبەش ل گەل هه‌سه‌دێ کێم کربوون.
