سێ وەلاتیێن ترکیێ کو ب ئارمانجا کارکرنێ چوونە عەرەبستانا سعوودیێ و ل وی وەلاتی ب تۆهمەتا بازرگانیکرنا ماددەیێن هشبەر هاتنە دادگەهکرن و جەزایێ دارڤەکرنێ بۆ وان هاتیە برین، ل گۆر بەرپرسەکی ئاکپێ، سەرۆککۆمارێ ترکیێ رەجەپ تاییپ ئەردۆگان ل سەر ڤێ دۆسیەیێ ل گەل بەرپرسێن ریازێ ئاخڤی یە.
ئەو هەرسێ کەسێن ب ناڤێن مەهمەت، ئانل و ئەرتان خەلکێ پارێزگەها هاتایێ یا باشوورێ رۆژهلاتێ ترکیێ نە و کارکەرن. ئەو ب ئارمانجا کارکرنێ چوونە عەرەبستانا سعوودیێ و پشترە پەیوەندی ل گەل مالباتێن وان هاتیە كرن و ژ وان رە هاتیە گۆتن کو کورێن وە ل سەر ماددەیێن هشبەر هاتنە گرتن.
هەرسێ وەلاتیێن ترکیێ هاتنە دادگەهکرن و ب بریارا دادوەر، جەزایێ دارڤەکرنێ ل سەر وان هاتیە فەرزکرن. مالباتێن وان داخوازێ ژ حکوومەتا ترکیێ ب تایبەتی ژی ئەردۆگان دکن کو کورێن وان ئازاد بکن.
پارلامەنتەرێ ئاکپێ یێ هاتایێ حسێن یامان بۆ مەدیایا وەلاتێ خوە راگهاند کو ئەردۆگان ل گەل بەرپرسێن سعوودیێ کەتیە تێکلیێ و داخواز کریە کو ئەو هەرسێ تۆهمەتبار بۆ ترکیێ بێن رادەستکرن. ئەو پارلامەنتەر هەروها دبێژە، وەزیرێ دەرڤە یێ ترکیێ مه‌ولوود چاویشۆغلو ژی ل گەل بەرپرسێن سعوودیێ ل سەر خەتێ یە.
پارلامەنتەرێ ئاکپێ هێڤی کر و گۆت، ئەو ل بەندا مزگینیێ نە. ئەڤ د دەمەکێ دەیە هەتا نها حکوومەتا عەرەبستانا سعوودیێ ب فەرمی ت بەرسڤەک یان داخویانیەک ل سەر دۆسیەیا وان هەرسێ کەسان نەدایە.
