سەرۆککۆمارێ ترکیێ رەجەب تەییب ئەردۆگان ئەشکەرە کر، وی ژ سەرۆکێ روسیایێ ڤلادمیر پوتین خواستیە، ترکیا، رووسیا و سووریا گاڤێن ھەڤبەش باڤێژن و سەرۆکێن ھەر سێ وەلاتان بجڤن.
ئەردۆگان دەما ژ سەردانا خوەیا ترکمەنستانێ ڤەدگەریا، بەرسڤا پرسێن رۆژنامەڤانان دا و دەربارێ ئۆپەراسیۆنەکا بەژاھی یا ل دژی رۆژئاڤایێ کوردستانێ دا ئەشکەرە کر، وی ژ سەرۆکێ روسیایێ ڤلادمیر پوتین خواستیە، بلا ترکیا، رووسیا و سووریا گاڤێن ھەڤبەش باڤێژن و سەرۆکێن ھەر سێ وەلاتان بجڤن.
ئەردۆگان دیار کر کو پوتین ب ئەرێنی پێشوازیا ڤێ داخوازێ کریە، ھەروھا ل سەر پرسەکێ ئەشکەرە ژی کر، ئەو ژ بۆ ھەڤدیتنەکا لگەل سەرۆکێ سووریێ بەشار ئەسەد دەستوورێ ژ ئامەریکایێ وەرناگریت.
سەرۆککۆمارێ ترکیێ گۆت: “ئەم دخوازین سووریا، ترکیا و رووسیا پێکڤە پێنگاڤان باڤێژن. ژ بۆ ڤێ ژی دڤێت دەستپێکی سازیێن مە یێن ئیستیخباراتێ، بەرەڤانی و پشترە ژی وەزیرێن مەیێن دەرڤە بێن جەم ھەڤ. بلا سەرۆک ژی بێن با ھەڤ. من ئەڤ یەک بۆ سەرۆکێ رووسیایێ ڤالدمیر پوتین کر، وی ژی ئەرێنی دیت. ئەم دێ ب ڤی ئاوایی رێیا ھەڤدیتنان ڤەکن.”
ئەردۆگان ھەروھا گۆت: “رێخستنێن تەرۆرێ ب تایبەت ل باکورێ سووریێ راناوەستن و جار جاران گەفان ل وەلاتێ مە دخون. د ڤێ مژارێ دا بریارێن مەیێن ل سۆچی و ئاستانا ھاتنە دایین ھەنە. ژ سینۆرێ مە ھەتا ب 30 کیلۆمەترەیان بەر ب باشوور ڤە دەما ئەم بێن عاجزکرن، ئەڤ کۆریدۆرا مەیا ئەولەکاریێ یە. د ڤێ کۆریدۆرێ دا یا پێویست ئەم دێ بکن. ئەڤ نە تشتەکی نوویە و ل ئاستانا ژی بوویە رۆژەڤ. ھەروھا ل سۆچی ژی ئەم ل سەر ئاخڤتینە.”
ل سەر گۆتنێن کو دبێژن ئامەریکا ب ئاوایەکی ئەرێنی بەرێ خوە نادە ھەڤدیتنێن لگەل ئەسەد، ئەردۆگان گۆت: “ئەز ژ کەسی دەستوورێ وەرناگرم کا ئەز دێ لگەل کێ ل کو چ ھەڤدیتنان بکم. من لگەل سەرۆککۆمارێ مسرێ ل قەتەرێ ھەڤدیتنەک کر و ژ کەسی دەستوور وەرنەگرت. د مژارا سووریێ دا ژی گاڤێن کو ئەم دێ هاڤێژین دێ د بەرژەوەندیێن مەیێن نیشتمانی دا بن. ژ ھەرێما ئەولە یا ل سووریێ بگرە ھەتا تەدبیرێن کو ئەم دێ ل دژی رێخستنا تەرۆرێ وەربگرن، ئەڤ ژی یەک ژ وان گاڤانە کو ئەم دێ هاڤێژن.”
ئەردۆگان دەربارێ داخویانیا خوە یا کو د 2023یێ دا دێ جارا داوین ببە نامزەد، گۆت کو ئەڤ نایێ وێ واتەیێ کو ئەو دەست ژ سیاسەتێ بەرددە.
