ههپهگێ گۆت کو فەرماندارەکی وان یێ 30 سال ل چیایی مایی ژیانا خوە ژ دەست دایە، د داخۆیانیا د چاپەمەنیێ یا كو پهكهكێ دای، هن مژارێن ب گومان و بالکێش هەنە.
ههپهگێ دوهـ داخۆیانیەک دا و راگهاند کو فەرماندارێ گەریلا یێ ب ناڤێ «بیلال قاراکوش» ب كۆدناڤێ «عهلی حهیدهر دێرسم – عهلی حهیدهر شەڤاخی» ژیانا خوە ژ دەست دایە، لێبەلێ د داخۆیانیێ دا وهزیفه و سەدەمێن ژیان ژ دەست دانا قاراکوش نەهاتنه ئەشکەرە کرن.
قاراکوشێ د سالا 1993 دا تەڤلی گەریلا بوو، ژ عەشیرا شەڤاخی یا دێرسمێ یە، قاراکوش ب سالان ل هەرێمێن دێرسم، دەریا رەش و ئەرزهرۆمێ فەرماندارییا هێزێن گەریلا کری یه و د کۆنفەرانسا ههپهگێ یا 2009 دا بوویە ئەندامێ مەجلیسا لەشکەری، بیلال قاراکوش ل سالا 2015 ژی ب فەرماندارێ گشتی یێ هێزێن ههپهگێ یێن کەرکووک و وارگەها مەخموورێ دهات ناس كرن.
ژ وونداهیێن ل دێرسمێ عاجز ببوو
قاراکوش ب سالان د ئاستا بلند د رێڤەبەریا ههپهگێ یا ب ناڤێ «کۆنسەیا فەرمانداریێ» دا جهـ گرتبوو، لێ د داخویانیا ههپهگێ دا ئەرکا قاراکوش نەهاتە دیار کرن، تەنێ وەکە فەرماندارێ وێرەک هاتە بناڤ کرن، د داخویانیا ههپهگێ دا ئیفادەیێن کو پرۆپاگاندایا ل سەر دێرسمێ تێ کرن هاتن بکارئانین.
چاڤکانیێن نێزی پهكهكێ یێن کو «دارکا مازی» خوە گهاندینێ، دیار دکن کو عەلی حەیدەر د ڤان دەمێن داویێ دا رە پرسگرێک ل گهل پهكهكێ ههبوون، ههپهگێ ب تایبەت ل پارێزگهها دێرسمێ د ئاستا فەرمانداریێ دا گهلهك زرارێن گیانی ل پهی ههڤ دابوون، فەرماندارێن وەکە «ماهر ئاتاکان» هاتن تاسفیەکرن، ههروهها ناڤێن وەکە «باران دێرسم – ئیسماعیل ئایدەمیر» و «یلماز دێرسم – ئیسمائیل سوورگەچ» د ئۆپەراسیۆنێن سالێن داویێ دا ل پەی هەڤ ژیانا خوە ژ دەست دان، ئانگۆ ل دێرسمێ گەریلا هاتن تهسفیە کرن.
چاڤكانیێن داركا مازی ئهشكهره كرن كو «بیلال قاراکوش» ژ بەر ڤێ رەوشا خەراب کەتبوو ناڤا دەرۆنییەکا ئالۆز دا، وی خوە ژ خەباتێن فەرمانداری ڤەکشاندبوو و رەخنە ل پهكهكێ گرتن.
لێبەلێ پرسگرێكا مەزن یا بیلال قاراکوش ئەڤ بوویە کو «عهلی حهیدهر قهیتان» ئانكو «فوئاد دێرسم» ب دەستێ پهكهكێ هاتییە کوشتن، ئەو ژ یەک باژێر بوون و د هەمان دەمێ دا «قاراکوش» گەلەک ژ عهلی حهیدهر قهیتان حهز دکر، ژ بەر ڤێ یەکێ ژی بەرانبەر پهكهكێ د پرسگرێكهكه مهزن دا ژیا.
چاڤكانیێن داركا مازی ههروهها دهستنیشان كر كو د سالێن داویێ دا پهكهكێ هەموو ئەرکێن فەرماندارهتیێ ژ وی وهرگرتبوون و جهێ وی هەر تم دگوهارت، ههروهها ئهشكهره كرن كو جەمیل بایک گۆتیە: «ژ دێرسمێ گەلەک کادرۆیێن مە نەمانە، عهلی حهیدهر ژی دبیت کو ڤهقهتیت، لهوما ژی وی ئیدارە بکهن، نەهێلن کو ژ ناڤا مە ب رەڤیت».
ئەم ووسا دبینن کو، بیلال قاراکوش د ناڤا پهكهكێ دە هاتیە تهسفیه کرن.
گەلۆ قاراکوش ل مووسلێ ژیانا خوە ژ دەست دایە؟
چاڤکانیێن دیار دکن کو شێوازێ کوشتنا عهلی حهیدهر، ژ گەریلایان تێ ڤەشارتن، هەروهها، چاڤکانی دیار دکن کو د ڤان دەمێن داویێ دا ژ بەر زرارێن گیانی یێن فهرماندارێن پایابلند، بێ مۆرالییهكا مەزن د رێڤهبهرییا پهكهكێ دا تێ ژیان كرن، ژ بەر ڤێ سەدەمێ ب زەلالی نایێ زانین کو عهلی حهیدهر دێرسم کا چاوا ژیانا خوە ژ دەست دایە، د داخویانیا پهكهكێ دا ژی نەهاتیە دیار کرن.
هن چاڤکانیان دیار کرن کو دەما عهلی حهیدهر ل 17ێ تیرمەها 2022 ژ کامپا مەخموورێ بەر ب رۆژئاڤا ڤه دچوو، ئۆتۆمۆبیلا کو ئەو تێدا بوو ل نێزی مووسلێ ژ ئالیێ بالافرێن ترکیێ ڤە هاتییە لێخستن. لێبەلێ مە نکاری ڤێ یەکێ ب یەکجاری زەلال بکین.
لێ پر بالکێشە کو ئەندامەکێ پهكهكێ یێ کو 30 سال خزمەت کری شههادهتا وی بێ ڤەشارتن و راستیێن ڤێ بوویەرێ ڤهشارتی بمینن.
