شاندەکێ ھەڤپەیمانیا ناڤدەولەتی چەند مژار لگەل وەزارەتا پێشمەرگە گۆتووبێژ کرن و ھێزێن ھەڤپەیمانان پشتەڤانیا خوە بۆ یەکگرتن و چاکسازیێن وەزارەتا پێشمەرگە دوبارە کرن.
وەزارەتا پێشمەرگە دا زانین، سەرفەرماندارێ گشتی یێ وەزارەتا پێشمەرگە سەرلەشکەر عیسا ئوزێر و سەکرەتەرێ گشتی یێ وەزارەتا پێشمەرگە بەختیار محەمەد سادق لگەل شاندەکێ لەشکەری یێ ھێزێن ھەڤپەیمانان ب سەرۆکاتیا کۆلۆنەل پیتەرس جڤیان.
د ھەڤدیتنا کو رێڤەبەرێ گشتی یێ دارایی یێ ھەرێما کوردستانێ در. محەمەد سەلیم مزووری ئامادە بوو، پێوەندیێن د ناڤبەرا ھەر دو ئالیان دا ھاتن گۆتووبێژکرن، ھەر وھا بەحسا پێنگاڤێن وەزارەتا پێشمەرگە یا دەربارێ چاکسازکرن و پێکانینا فرەقەیان و چەندین مژارێن گرێدایی چاکسازیا وەزارەتا پێشمەرگە کرن.
بەرپرسێن وەزارەتا پێشمەرگە دەربارێ ھەر یەک ژ وان مژاران دا شرۆڤەیێن پێویست پێشکێش کرن. ژ ئالیێ خوە ڤە، ھەڤپەیمانان جارەکا دن پشتەڤانیا خوە ژ بۆ پێنگاڤێن وەزارەتا پێشمەرگە د وارێ چاکسازی و یەکخستنا ھەموو ھێزان دا دوبارە کرن.
