جیگرێ نوونەرێ دائیمی یێ چینێ ل نەتەوەیێن یەکبوویی گەنگ شوئانگ کو ل ئەنجوومەنا ئەولەکاریێ یا نه‌ته‌وه‌یێن یه‌كبوویی ئاخڤی، ترکیە ژ بەر ئێریش گەفخوارنا دەستپێکرنا ئۆپەراسیۆنەکە بەژایی ل دژی رۆژئاڤایێ کوردستانێ و باکورێ سووریێ رەخنە کر و گۆت: «دڤێ ترکیە ڤان ئێریشان دەملدەست راوەستینە».
د لووتکەیا ل ئەنجوومەنا ئەولەکاریێ یا نەتەوەیێن یەکبوویی یا ب مژارا “سووریێ” دە د ناڤبەرا نوونەرێن چین و ترکیێ دە نیقاش دەرکەت.
جیگرێ نوونەرێ دائیمی یێ چینێ ل نەتەوەیێن یەکبوویی گەنگ شوئانگ د لووتکەیێ دە ئاخڤی و دیار کر کو رەوشا ئەولەکاریا سووریێ ئەڤ دەمەکە ئالۆز بوویە.
گەنگ شوئانگ گۆت: «ترکیێ گەلەک جاران ب ئێریشێن ئاسمانی و تۆپان ئێریشی باکورێ سووریێ کریە و گەفا دەستپێکرنا ئۆپەراسیۆنێن بەژایی بەردەوام دخوە، ئیسرائیل ژی گەلەک جاران ئێریشی هەدەفێن ل سەر ئاخا سووریەیێ کر، سووریە دەولەتەکە سەروەرە، هەر ئۆپەراسیۆنەکە لەشکەری ل سەر خاکا وێ، بێی رازیبوونا حکوومەتا سووریێ هەر ب چ بەهانەیێ ژی ب دێ ببە سەدەما بنپێکرنا سەروەری و یەکپارچەبوونا ئاخا وێ، ئەم بانگ ل ترکیە و ئیسرائیلێ دکن کو دەملدەست ئێریشێن ل سەر سینۆر راوەستینن و ب دیالۆگ و شێورێ چارەسەریەکێ ببینن».
شوئانگ ئانی زمان کو دڤێ «هەبوونا هێزێن بیانی یا نەقانوونی یا ل سەر ئاخا سووریێ» ژی وەرە بداویکرن، دیار کر کو پرسگرێکا ل سووریێ تەنێ ب رێیێن سیاسی چارەسەر دبە.
د بەردەوامیا ئاخافتنا خوە دە شوئانگ گۆت: «چارەسەریا سیاسی چ قاس زوو پێک وەرە، دێ گەل ژی زوو ژ ئێش و ئازارێن خوە خلاس ببە، بریارا ب هەژمارا 2254 نوونەراتیا لهەڤهاتنا ناڤدەولەتی ل سەر پرۆسەیا سیاسی یا سووریێ دکە و دڤێ ب تەمامی وەرە جیبجیکرن».
دیپلۆماتێ چینی دا زانین کو ئەو پشتگریێ ددن هەولدانێن شاندەرێ تایبەتێ نەتەوەیێن یەکبوویی ژ بۆ سووریێ گێر پێدەرسەن ژ بۆ جیبجیکرنا بریارا 2254ێ و گۆت، ئەو هێڤی دکن کو کۆمیتەیا دەستووری د زووترین دەم دە بجڤە.
ترکیێ رەد کر
پشتی رەخنەیێن گەنگ شوئانگ، نوونەرێ دائیمی یێ ترکیێ ل نەتەوەیێن یەکبوویی فەردون سنرلۆگلو بەرسڤا وی دا و وەک هەر جار ئەڤ ئێرشا ترکیێ وەک پاراستنا ئاخا خوە ب ناڤ کر.
فەردون سنرلۆگلو گۆت، مافێ ت وەلاتەکی نینە کو د رووبرووبوونا تەرۆرێ دە دەرسان بدە مە، ئیرۆ دەما کو ئەم سینۆرێن خوە دپارێزن و خەلکێ خوە دپارێزن، هنەک ئالی وی مافی د خوە دە دبینن، ژ مەرە بێژن چ بکن یان چ نەکن، لێ ئەم ڤێ یەکێ رەد دکن».
