گەلۆ بافل ل سەر شۆپا لاھۆر جەنگی دمەشە؟

گەلۆ بافل ل سەر شۆپا لاھۆر جەنگی دمەشە؟

سەردانا سەرۆکێ یەنەکێ بافل تالەبانی یا دوھ بۆ رۆژئاڤا و وێنەیێن کو لگەل روویێ رۆژنامەڤانی یێ رۆژئاڤا مەزلووم عەبدی و رایەدارێن دن پارڤە کربوون د ناڤا کوردان دا تێ نیقاشکرن. ژ بەر کو مەدیایا پەکەکێ ئەڤ بوویەر وەک پارچەیەک ژ مژارا یەکتیا ناڤبەرا کوردان نیشان دا. ب تایبەتی یێن کو نابینن کا یەنەکە و سلێمانی چاوا دناڤا قازانەکی دا دکەلن و ل ور چ دقەومە، راستیا کو ب ڤان سەردانان تێ نخوماندن نابینن.

ب راستی ژی ئالیێ ھەری گرینگێ سەردانا بافل تالەبانی بۆ رۆژئاڤا ئەوە کو ئەڤ سەردانە ب مەبەستا سەردابرن و نخوماندنا تەنگاسییێن کو یەنەکە تێ دا دەرباز دبە هاتیە ئەنجامدان.

تاکتیکا کەڤنا لاھوور شێخ جەنگی: خوە ب رۆژئاڤا پاک کرن

ئەڤ تاکتیک ژ دەما لاھوور جەنگی ڤە ھاتیە بکارئانین، کو بەرێ ل گەل بافل تالەبانی ھەڤسەرۆکێ یەنەکێ بوو لێ نھا شوور ل ھەڤ کێشانە. لاھوور جەنگی دەما دکەفتە هەر زەحمەتیەکێ، سەردانا رۆژئاڤا دکر و وێنە پارڤە دکرن. دەما کو ژ کار ھات ئاڤێتن ژی، هەڤژینا وی ژی ب پارڤەکرنا وێنەیێن مەزلووم عەبدی، ھەول ددا ل بەر رایا گشتی خوە پاک دەرخن. لێ ڤێ یەکێ تێرا پاککرنا روویێ وی نەکر. نھا نە دیارە کا دێ ژ بۆ بافل تالەبانی تێرا کت یان نا.

بافل تالەبانی ب پالپشتییا قوباد تالەبانی گاڤێن کو یەنەکە و سلێمانیێ زێدەتر دخن ناڤا تەنگەزارییێ دا دهاڤێژن. ژ ڤان پێنگاڤان یا یەکەم بێپارکرنا ھەموو کادرۆیێن یەنەکێ یێن وەلاتپارێزە. یەنەکە د ناڤا خوە دا وەکە ڤۆلکانێ دکەلە. پەکەکێ ل رانیا، قەلادزێ، چارقورنە  و دەڤەرێن چییایی دا دناڤا رێخستێنێن یەنەکێ دا خوە ب جیهـ کرییە. کادرۆیێن ناڤ یەنەکێ ژ بەر مەترسییا ل سەر وان ترسۆنەک و خەمسار تەڤدگەرن. یانی یەنەکێ کارەکتەرا خوەیا حزباتیێ ھەما بێژە وندا کریە.

دیسا نامزەدبوونا بافل تالەبانی و وەنداکرنا بەرھەم سالح د ھلبژارتنێن سەرۆککۆماریا ئیراقێ دا، تەڤی ھەموو نەرازیبوونان، د ناڤا یەنەکێ دا شکەستنەک و بێ ھێڤیبوون چێکر.

وەھاب حەلەبچەیی کوژەرێ ھاوکار جاف ل کێلەکا مەزلووم عەبدی

ھەولدانا بافل تالەبانی یا ژ بۆ تەسفیەکرنا کەسایەتێن موخالفێن خوە یێن د ناڤ یەنەکێ دا ب رێبازێن مافیایی، سەهمەک ل سەر ئەندامان چێکرییە، لێ رێزا وی ل ناڤا یەنەکێ دا بەرھەوا بوویە. د دەستپێکا ڤان بوویەران دا مرنا ھاوکار جاف، کو ژن و زارۆکێن وی یێن بچووک ژی د وەساییتێ دا بوون، د ئەنجاما تەقاندنا بۆمبەیەکا ژ دوور ڤە ل ھەولێرێ. ھاوکار جاف کو بەرێ فەرماندێ ھێزێن دژە-تەرۆرێ یێن یەنەکێ بوو، بەریا دو سالان ژ بەر پرسگرێکێن د ناڤا یەنەکێ دا دەست ژ ئەرکێن خوە کشاند بوو. کوژەران دیار کرن کو ئەو ژ ئالیێ ئیستخباراتا یەنەکێ و ئەفسەرێ ھێزێن دژە تەرۆرێ یێن یەنەکێ ڤە ھاتنە ئەرکدارکرن. یەک ژ ڤان ناڤان ژی وەھاب حەلەبجەیی بوو.

د شاندا یەنەکێ دا کو دوھ چووبوو رۆژئاڤا وەھاب حەلەبجەیی لگەل بافل تالەبانی بوو. ئەو کەسێ ئۆتۆمۆبیلا کو زارۆک تێ دا بوون بێ تەرەدووت بتەقینە ما وی وژدان ھەیە گەلۆ. بافل ڤی قاتلی “د بن ناڤێ یەکتیا کوردان دا” دخوازە پاک بکە.

ڤەقەتیایێن د ناڤا یەنەکێ

ئەڤ نە یەکەم تاوانا بافل تالەبانییە. د 25ێ مژدارا 2021ێ دا فەرماندەکی نێزیکی لاھوور جەنگی ب ناڤێ  موراد کانی کوردەیی د ئێریشا ل دژی ترومبێلا وی هاتیە ئەنجامدان دا ژیانا خوە ژ دەست دا. وێ دەمێ شک ل سەر بافل تالەبانی و ئیستخباراتا یەنەکێ زانیاری بوو. پشتی سالەکێ د مژدارا 2022یێ دا مالباتا مووراد کانی کوردەیی داخویانیەک دا و گۆت: “ئەم ب دەھان سالن ئەندامێن یەنەکێ نە، ئەم کوشتنا کورێ خوە قەبوول ناکن، ئەم ژ یەنەکێ دەردکەڤن” و تەڤلی پەدەکێ بوون.

ھات زانین کو نە تەنێ مالباتا موراد کانی کوردەیی، گەلەک مالباتێن دەردۆرا یەنەکێ خوە ژ کارێن یەنەکێ پاشڤە کشاندنە.

رەڤا ژ سلێمانیێ:

تێ زانین کو یەنەکێ د ژیانا رۆژانە دا سیاسەتەکا جدی یا فشار و ترساندنێ ھەیە. ل دژی ملکێن کارسازێن کو د بەرێ دا دگەل لاھوور دا پەیوەندی هەبوون، دۆرپێچەک گشتگیر ھەیە. ئیحالان نادن وان لایەنان، کارێ وان ھەر تم دهێت ئاستەنگ کرن، بافل تالابانی کەسێ کو گوھ نادە وی ژ ناڤا کارێن ئابۆری دەردخە.

ھەر وھا تەنگبوونا قادا ئابۆری یا ژ بەر سیاسەتا یەنەکێ و کێمبوونا پیشەسازیا، کارسازێن سلێمانیێ دترسینە. دەردۆرێن کارساز و وەبەرهێنەرێن سلێمانیێ ل سلێمانیێ وەبەرھێنانێ ناکن، مال و ملکێن خوە دفرۆشن و ھێدی ھێدی بەرێ خوە ددن ھەولێرێ.

مەلا فارووق مستەفا کو وەکە سندۆقا یەنەکێ دهێت بناڤ کرن ژی، تێ گۆتن کو پارەیێن خوە دەردخە دەرڤەیی وەلات.

بافل تالەبانی ل رۆژئاڤا دێ بەحسا ئابۆریێ بکە؟

دهێت زانین کو شەریکا قەیوان یا بەرھەم سالح ئەڤە دەمەک درێژە ل رۆژئاڤا بازرگانیێ دکە. ھەتا دهێت گۆتن پەترۆلا رۆژئاڤا ب رێیا شیرکەتێن یەنەکێ و بەرھەم سالح ب رێیێن نەیاسایی تێن فرۆشتن. تێ تەخمینکرن کو د سەردانا بافل تالابانی دا ئەو مژارا پەیمانا بازرگانی یا ڤەشارتی بهێتە نووکرن.

ھەر وھا پلانا پەکەکێ و یەنەکێ یا ئاڤێتنا پێنگاڤەکاسیاسی یا ھەڤپار ھەیە. د بن ناڤێ “کۆنگرەیا نەتەوی” دا پلان دکن کو ڤێ بکن. واتە د سەردانا بافل تالابانی ژ بۆ مەزلووم عەبدی و رۆژئاڤا دا زێدەتر سەردابرن، پارچەبوون و خاپاندن ھەیە ئانکو مژار نە یەکیتیا نەتەوەیی.

ژ بەر ڤێ یەکێ ژی مرۆڤ ل وێنەیێن بەلاڤبوویی بنێرە و وەکە کو “کورد ل ھەڤ دجڤن” کێفخوەش ببە وێ نەراست بە، ئەو تەنێ دیتنا بەر پەردەیێ یە. د پشت پەردەیێ دا خویایە کو ئەو بکوژن یێن ھەڤالێن خوە بێی ترس کوشتی، قاچاخچیتی دکەن و ئاریشەیان ژ بۆی دادپەروەری دروست دکن. یەنەکە دناڤا خوە دا نە یا ب تفاقە، ئەڤجا دێ چاوا بەحسا تفاقا نەتەوەیی کت. لێ تشتێ مسۆگەر ئەوە کو ئەڤ سەرەدانە دێ ھێزا پەکەکێ یا ل سلێمانییێ خورتتر بکە و دێ ئالۆزییان زێدەتر بکە.

پوستێن ھەمان بەش