پشتی کوشتنا 3 وەلاتیێن کورد ل پاریسا پایتەختا فرانسایێ د ئەنجاما ئێریشەکا چەکداری دا، سەرۆککۆمارێ فرانسایێ ئەمانوئێل ماکرۆن ئەڤ کریارە ” شەرمەزارکەر” ب ناڤ کر.
ماکرۆن رۆژا ئینێ 3ێ کانوونا یەکەم ل سەر تویتەرێ وھا گۆت: “ئێریشەکا ھۆڤانە ولاتیێن کورد یێن ل فرانسا ل ناڤەندا پاریسێ کرە ئارمانج. دلێ مە د گەل قوربانیان، مالبات و حەژێکەرێن وان و یێن کو ھەول دای ژیانا خوە بپارێزن دایە.”
د ئێریشا چەکداری یا ل سەر “ناڤچەیا 10” یا پاریسێ کو گەلەک وەلاتیێن کورد لێ دژین، 3 کەسان ژیانا خوە ژ دەست دان.
پشتی ڤێ ئێریشێ گەلەک وەلاتیێن کورد ل پاریسێ داکەتن کۆلانان و ب لدارخستنا خوەنیشاندانێن مەزن د گەل پۆلیسێن ڤی وەلاتی دا شەر کرن.
ل گۆر داخویانیا دۆزگەریا گشتی یا پاریسێ، د ئەنجاما ڤێ ئێریشا چەکداری دا 3 کەس ھاتن کوشتن و 3 کەس ژی بریندار بوون.
د ڤێ دەربارێ دا وەزیرێ ناڤخوەیێ فرانسەیێ «گەرالد دارمانین» دا زانین کو، ئەنجامدەرێ ڤێ ئێریشێ وەلاتیەکی فرانسییە و مەبەستا ڤێ ئێریشێ ژی “ئارمانجکرنا بیانیان” بوویە.
ئەنجامدەرێ ڤێ ئێریشێ کو ناڤێ وی “ویلیام ئێم”ە، 69 سالییە و شۆفێرێ ترێنێ یێ خانەنشینبوویی یە.
بابێ وی یێ 90 سالی دوھ ژ بۆ مەدیایا فرانسی گۆتبوو کورێ وی “دین بوویە”.
ل گۆر زانیاریان، ئەنجامدەرێ ڤێ ئێرشێ 11 رۆژان بەرێ ھەتا دادگەھکرنا وی ب ئاوایەکی دەمکی ھاتبوو ئازادکرن. ژ بەر کو د 8ێ کانوونا سالا بۆری دا ب شووری ئێرشی کامپەکا پەنابەران کربوو.
