رۆژنامەیەکە ئه‌مه‌ریكی راگهاند، رێڤەبەریا ئه‌مه‌ریكا ژ سالا 2020ێ ڤه هشیاری بۆ ڤەگەرا داعشێ و زێدەبوونا چالاکیێن وێ د سالێن پێش دە دایە.
ئاژانسا «ئاسۆشێتێد پرێس» راگهاند، رێڤەبەریا ئه‌مه‌ریكی د سالا 2020ێ دە د راپۆرتەکێ دە هشیاری دا کو رێخستنا تەرۆریستیا داعشێ دێ ڤەگەرە ئیراقێ.
راپۆر هشیاریێ ددە رایەدارێن ئه‌مه‌ریكی کو داعش د سالێن پێش دە چاوا دکارە رێزێن خوە ل هوندرێ ئیراقێ ژ نوو ڤە چالاک بکە و رێکخستن بکە.
د راپۆرتا ئاسۆشێتێد پرێس دە هاتیە کو پشتی ڤەکشینا ئه‌مه‌ریكا ژ ئیراقێ، رێخستنا تەرۆریستا داعشێ دێ گاڤ ب گاڤ رێزێن خوە ل ناڤچەیێن کو بەرێ ل ئیراقێ کۆنترۆل کربوون، ژ نوو ڤە برێخستن بکە و دیسا دەست ب ئێریشان بکە.
ئەڤ د دەمەکێ دە یە، داعشێ د ڤێ مەهێ دە ئێرشێن خوە ل سەر هێزێن ئەولەهیێ و سڤیلێن پارێزگەهێن دیالا و کەرکووکێ زێدە کریە.
بەری نها رۆژنامەیا «واڵ ستریت جۆرنال» ژی راگهاندبوو کو داعش ل ئیراقێ ڤەگەریایە و تێ پێشبینیکرن کو د رۆژێن پێش دە هەژمارا چالاکیان زێدەتر ببە.
رۆژنامەیێ گۆت کو تەڤگەرێن ڤێ داویێ یێن داعشێ تەنێ دەستپێکا کامپانیایەکە مەزنا تەرۆرێ یە ل ئیراقێ، ئەگەر بەرپرسێن ئەولەهیێ زوو گاڤێن پێویست نەئاڤێژن، دێ زیانێن داعشێ زێدەتر ببن.
پشتی ئێریشێن ڤێ داویێ ل کەرکووک و دیالایێ، بەردەڤکێ فەرمانداریا ئۆپەراسیۆنێن هەڤبەشێن ئیراقی تەحسین خەفاجی ژ رۆژنامەڤانان رە گۆتبوو: «داعش تەکتیکێن خوە گوهەرتیە و کاروانێن سەربازی و ئەولەکاری ب بۆمبەیێن ب دەست چێکری ئارمانج دکە. دڤێ هێزێن ئەولەهیێ ژی تەدبیرێن خوە یێن ئەولەهی و ئستخباراتی ژ بۆ تێکبرنا شانەیێن داعشێ ل هەموو دەڤەرێن ئیراقێ بلەزتر بکن».
هەر گرێدایی ئێریشێن ڤێ داویێ یێن داعشێ، سەرۆکوەزیرێ ئیراقی محەمەد شه‌یاع سوودانی رۆژا چارشەمبا بۆری سەرپەرەشتیا جڤینەکە ئەولەکاری کر و رەوشا پارێزگەهێن کەرکووک و دیالایێ گۆتووبێژ کر.
